🌱 “पर्यावरणाची सावली पेरुया” – विभागीय परिषदेचा संकल्प

विभागीय आयुक्त कार्यालयात नुकतीच पर्यावरण, वन व जलवायू परिवर्तन संवर्धन परिषदेची बैठक पार पडली. विभागीय आयुक्त जितेंद्र पापळकर यांच्या अध्यक्षतेखाली झालेल्या या बैठकीत “बिजमहोत्सव, चला सावली पेरुया, हरितोत्सव” यांसारख्या उपक्रमांच्या माध्यमातून मराठवाड्यात पर्यावरण जनचळवळ उभारण्याचा निर्धार करण्यात आला.

या बैठकीत १७ संस्थांचे प्रतिनिधी, पर्यावरण कार्यकर्ते आणि अधिकारी एकत्र आले. प्रास्ताविक करताना सुपर्ण जगताप (लातूर वृक्ष चळवळ) यांनी हवामानातील बदल, शाश्वत विकास आणि जैवविविधतेचे जतन या विषयांवर सखोल विवेचन केले. त्यांनी “बिजमहोत्सव” आणि “सावली पेरुया” सारख्या उपक्रमांची आवश्यकता पटवून देत समाज, शाळा, महाविद्यालये आणि शासन यांनी एकत्रित कृती आराखडा राबवण्याचे आवाहन केले.

बैठकीदरम्यान काही सदस्यांनी शेतकरी–वन्यप्राणी संघर्ष, शाश्वत वृक्ष लागवड, ऑक्सिजन पार्क निर्मिती यासारख्या विषयांवरील अनुभव मांडले. चित्रमय स्लाईड व पॉवरपॉईंट सादरीकरणाद्वारे पर्यावरण संवर्धनाच्या विविध कल्पना उपस्थितांसमोर मांडल्या गेल्या.

अध्यक्षस्थानावरून बोलताना विभागीय आयुक्त जितेंद्र पापळकर म्हणाले,
“एक गाव – एक तालुका या पद्धतीने उपक्रम राबवले, तर हरितक्रांतीची पाऊलवाट स्पष्ट होईल. शासनाच्या योजना आणि स्वयंसेवी संस्थांच्या पुढाकाराचा संगम साधला तर बदल नक्कीच घडेल.”

या परिषदेला जयाजी पाईकराव (हिंगोली), आनंदराव आसोलकर (छत्रपती संभाजीनगर), अमृत सोनवणे (लातूर), डॉ. बी. आर. पाटील, भीमराव भिसे (हिंगोली), सारंग साळवी (परभणी), पुष्कराज तायडे (जालना), सिद्धार्थ सोनवणे (बीड), संतोष रेपे (धाराशिव), मुरलीधर बेलखोडे (वर्धा), दुर्गा भड (अकोला), यशवंत पांडे (अमरावती), विठ्ठल बदक (चंद्रपूर), अभय देशपांडे व प्रदीपकुमार (नंदुरबार) यांसह अनेक मान्यवर उपस्थित होते.

आजच्या या बैठकीतून स्पष्ट झाले की –
पर्यावरण वाचवणे ही केवळ जबाबदारी नसून पुढील पिढ्यांना दिलेली आपली जीवनदायी ठेव आहे. झाड, बीज, पाणी आणि हवा यांच्या संवर्धनातूनच शाश्वत भविष्यासाठी हिरवाईचा वारसा उभा राहील. 🌿