युवक-युवतींनी मुख्यमंत्री रोजगार निर्मिती कार्यक्रम योजनेतून स्वतःचा उद्योग, व्यवसाय उभारावा- जिल्हा खादी ग्रामोद्योग अधिकारी चिंतामणी गुट्टे
लातूर, दि. १८ : गणेशोत्सवाच्या माध्यमातून शासनाच्या विविध योजना, उपक्रम आणि धोरणात्मक निर्णयांची माहिती जनतेपर्यंत थेट पोहोचविण्यासाठी राज्य शासनाच्या माहिती व जनसंपर्क विभागामार्फत ‘लोकसंवाद २०२६’ हा उपक्रम राबविण्यात येत आहे. या अंतर्गत निलंगा तालुक्यातील मसलगा येथे विविध योजनांची माहिती देण्यात आली. यावेळी मार्गदर्शन करताना जिल्हा खादी ग्रामोद्योग अधिकारी चिंतामणी गुट्टे यांनी युवक-युवतींना मुख्यमंत्री रोजगार निर्मिती कार्यक्रम योजनेची माहिती दिली, तसेच या योजनेतून स्वतःचा उद्योग, व्यवसाय सुरु करण्यासाठी पुढे येण्याचे आवाहन केले.
लातूर जिल्हा माहिती कार्यालयाच्या वतीने मसलगा येथील नारीशक्ती गणेश मंडळ येथे गुरुवारी आयोजित या कार्यक्रमाला या उपक्रमात कृषि विभाग, जिल्हा खादी ग्रामोद्योग विभागाच्या योजनांची माहिती देण्यात आली. मसलगा गावातील सर्व गणेश मंडळांना एकत्रित करून लोकसंवाद कार्यक्रम घेण्यात आला. कार्यक्रमाच्या अध्यक्षस्थानी सरपंच गणेश शेळके होते. तर प्रमुख पाहुणे म्हणून जिल्हा खादी ग्रामोद्योग अधिकारी चिंतामणी गुट्टे, उपकृषी अधिकारी सुनील घारोळे, प्रभारी जिल्हा माहिती अधिकारी तानाजी घोलप, पोलीस पाटील संतोष नरहरे, तंटामुक्ती अध्यक्ष संतोष तोरखडे, हरिदास साळुंके, संभाजी पाटील, राजकुमार सोनी यांची उपस्थिती होती.
ग्रामीण भागातील युवक-युवतींना स्वतःचा उद्योग, व्यवसाय सुरू करण्यासाठी मुख्यमंत्री रोजगार निर्मिती कार्यक्रम अंतर्गत अर्थसहाय्य देत आहे. ५० लाख ते १ कोटी रुपयेपर्यंतच्या प्रकल्पासाठी १७ लाख ५० हजार पर्यंत अनुदान देण्यात येते. १ लाख ते १ कोटी पर्यंतच्या कोणत्याही प्रकल्पासाठी या योजनेचा लाभ घेता येतो, असे जिल्हा खादी ग्रामोद्योग अधिकारी चिंतामणी गुट्टे यांनी केले. यावेळी त्यांनी प्रधानमंत्री विश्वकर्मा योजना, मधाचे गाव या योजनांची माहिती दिली.
कृषी अधिकारी सुनील घारोळे यांनी कृषि विभागाच्या महाकृषी विस्तार एआय ऍप, एफएफएस ऍप आणि महाडीबीटीच्या माध्यमातून कृषि विभागाच्या विविध योजनांसाठी अर्ज करण्याबाबत मार्गदर्शन केले.
प्रभारी जिल्हा माहिती अधिकारी तानाजी घोलप यांनी माहिती व जनसंपर्क विभागामार्गत आयोजित उपक्रमाबाबत माहिती दिली.
यावेळी मसलगा येथील नारीशक्ती गणेश मंडळ, शंभुराजे प्रतिष्ठान गणेश मंडळ, नवयुवक गणेश मंडळ, बालगणेश मंडळ, संभाजीराजे गणेश मंडळ, जयभवानी गणेश मंडळ, तुळजाभवानी गणेश मंडळ, युवा उद्योजक गणेश मंडळ, इंदिरानगर गणेश मंडळ आदी गणेश मंडळाचे अध्यक्ष पदाधिकाऱ्यांचा यावेळी सत्कार करण्यात आला.
यावेळी माधव शिंदे, योगेश पाटील, दत्ता जाधव, नारीशक्ती गणेश मंडळांच्या अध्यक्ष सौ. आरती तुळशीदास साळुंके, सचिव राधिका राजेंद्र पिंड, इतर गणेश मंडळाचे महेश मोहिते, श्रीप्रसाद पाटील, महेश पारवे, अमन शेख, मेघराज पाटील, सचिन पवार, अविनाश आरेराव, सुरेश तोरखडे, अक्षय देशमुख, कृष्णा कुलकर्णी, विशाल पाटील, सागर पाटील, माधव लव्हरे, ओमकार जाधव, श्रीकांत जाधव, अभिषेक शिंदे, सचिन कांबळे, पुरूषोत्तम शिंदे, किशोर शिंदे, संकेत तेलंगे, शेखर गिरी, सिध्दार्थ पवार आदींसह गावातील नागरिक मोठ्या संख्येने उपस्थित होते. कार्यक्रमाचे सूत्रसंचालन पत्रकार रमेश शिंदे यांनी केले. तर प्रास्ताविक रविकिरण सूर्यवंशी यांनी केले.
