🌸 फक्त लहर नाही, भक्तीचं वादळ 🌸

लातूर व मराठवाड्यात गुरुदेव श्री श्री रविशंकर यांच्या दिव्य उपस्थितीत उमटला ८० हजारांचा जनसागर

लातूर, दि. ९ सप्टेंबर –
नऊ वर्षांच्या प्रतीक्षेनंतर लातूरच्या भूमीने जागतिक आध्यात्मिक गुरू व मानवतावादी नेते गुरुदेव श्री श्री रविशंकर यांचे दर्शन घेतले. यशोदा ज्वेलर्स मैदानावर तब्बल ८० हजारांहून अधिक श्रद्धाळू भक्त एकवटले आणि संपूर्ण परिसर भक्ती, संगीत व आनंदाच्या नादाने दुमदुमून गेला.

“लातूरमध्ये आम्ही थक्क झालो. या मातीत काहीतरी खास आहे. कधीकाळी पाण्यासाठी टँकर यायचे; आजचा शेतकरी मात्र समृद्धीकडे वाटचाल करत आहे. हा बदल जगासाठी प्रेरणादायी आहे,” असे गुरुदेवांनी आपल्या प्रवचनात सांगितले.

ते पुढे म्हणाले, “प्रत्येक घरी ध्यान असेल, प्रत्येक जेवणापूर्वी शेतकऱ्यांसाठी प्रार्थना असेल, तर समाज आर्थिक, मानसिक आणि शारीरिक दृष्ट्या बळकट बनेल. युवकांनी कौशल्य प्रशिक्षण घ्यावे आणि प्रत्येक घराच्या अंगणात एक वडाचे झाड लावावे, हा माझा संदेश आहे.”

या प्रसंगी महाराष्ट्राचे सहकार मंत्री श्री. बाबासाहेब पाटील, आमदार श्री. अभिमन्यु पवार, माजी मंत्री श्री. अमितजी देशमुख व श्री. विक्रमजी काळे यांसह अनेक मान्यवर उपस्थित होते.

स्थानिक शेतकऱ्यांनी आर्ट ऑफ लिव्हिंगच्या जलसंवर्धन मोहिमेचा अनुभव कथन केला. एका शेतकऱ्याने सांगितले, “२०१० मध्ये गावकऱ्यांनी आणि आर्ट ऑफ लिव्हिंगने मिळून जलजागृती अभियान सुरू केले. तीन वर्षांत टँकरची गरज संपली, विहिरी पुन्हा भरल्या आणि शेती फुलली. आज गावातील कोणत्याही महिलेला पाण्यासाठी बाहेर जावं लागत नाही—प्रत्येक घरात विहिरीत पाणी आहे.”

गुरुदेवांची ही यात्रा मराठवाड्यातील दशकभराच्या कार्याला अधोरेखित करणारी ठरली. २०१३ मध्ये रेना, तावर्जा आणि घरनी नद्यांच्या पुनरुज्जीवनापासून सुरू झालेली ही मोहीम आज एक मोठं पर्यावरणीय आंदोलन बनली आहे. पाच लाखांहून अधिक देशी, औषधी व फळझाडे लावण्यात आली असून त्यापैकी १००% झाडे आजही हिरवीगार उभी आहेत. पुढील टप्प्यात अजून दोन लाख झाडे लावण्याचा संकल्प आहे, ज्यातील निम्म्या प्रजाती चारापिकांच्या असतील, जेणेकरून पशुधन आणि शेती व्यवस्था दोन्ही अधिक सक्षम होतील.

लातूरच्या भूमीत उमटलेलं हे भक्तीचं वादळ केवळ श्रद्धेचा आविष्कार नव्हे, तर पर्यावरण-जागरूकता, सामाजिक बांधिलकी आणि आध्यात्मिक उर्जेचं नवं पर्व ठरलं आहे.