लातूर, प्रतिनिधी : महावितरणकडून स्मार्ट मीटरबाबत ग्राहकांच्या शंका दूर करण्यासाठी व जनजागृतीसाठी उपविभागनिहाय आयोजीत ग्राहक समाधान मेळाव्यास लातूर शहर उपविभागासह जिल्हयातील इतर उपविभागात वीजग्राहकांचा उत्तम प्रतिसाद मिळाला. या मेळाव्यास लातूर परिमंडळाचे मुख्य अभियंता अरविंद बुलबुले यांनी स्वत: हजेरी लावत ग्राहकांच्या शंकांचे निरसन केले.
लातूर विभागातील लातूर शहर उपविभाग, निलंगा विभागातील किल्लारी तसेच उदगीर विभागातील उदगीर शहर व ग्रामीण उपविभाग आणि जळकोट उपविभाग येथे आज (दि.१६) स्मार्ट मीटर जनजागृतीसाठी मेळावा घेण्यात आला. याप्रसंगी मुख्य अभियंता अरविंद बुलबुले यांनी स्मार्ट मीटर बाबत तक्रारी जाणून घेत त्यांच्या शंकांचे निरसन केले. त्याचबरोबर काळानुरुप वीजमीटरच्या तंत्रज्ञानात होत गेलेल्या बदलांची माहिती दिली. जुने फिरणारे चकतीच्या मीटर पासून ते इफलेक्ट्रॉनिक मीटर, रेडीओ फ्रीक्वेन्सी मीटर पर्यंतचा होत गेलेला ग्राहकाभिमूख बदलांचा इतिहास सांगत स्मार्ट मीटर अधिक अचूक असून वीजग्राहकांचा जेवढा वीजवापर आहे तेवढाच नोंदवला जातो अशी माहिती दिली. त्याचबरोबर रिडींग मध्ये होणारा मानवी हस्तक्षेप टाळून नेमके वीजवापराचे बील दिले जाते. मीटर मध्ये छेडछाड कय्न होणारी वीजचोरीही तत्काळ सर्व्हरला कळत असल्यामुळे वीजगळतीवरती नियंत्रण ठेवणे शक्य होत असल्याचे सांगत, स्मार्ट मीटर मुळे रियल टाईम वीजवापर कळतो व ग्राहकांना वीजवापरावर नियंत्रण ठेवणे शक्य होते. दिवसा वीजवापरावर ८० पर्यंतची प्रति युनीट सूट मीळत असल्यामुळे वीग्राहकांचाही यात लाभ होत असल्याचवे श्री बुलबुले म्हणाले. ज्या ग्राहकांना वाढीव वीजबील येत आहे त्यांनी आपल्या घरातील आर्थिंग चेक करावी तसेच आरसीबी लावून घेण्याचाही सल्ला त्यांनी दिला. यावेळी लातूर विभागाचे कार्यकारी अभियंता अनिरुध्द घाटगे, अतिरिक्त कार्यकारी अभियंता प्रमोद दुधाळे उपस्थित होते.
आज व उद्या या ठिकाणी होणार मेळावा
लातूर ग्रामीण व रेणापूर उपविभाग, मध्ये बुधवारी (दि.१७ जून), तसेच मुरुड उपविभाग येथे गुरूवारी (दि.१८ जून) , निलंगा विभागांतर्गत बुधवारी (दि.१७ जून) कासारशिरशी उपविभागात तर गुरुवारी (दि.१८ जून) औसा, निलंगा व शिरुर अनंतपाळ उपविभागात त्याचबरोबर उदगीर विभागातील अहमदपूर, शिरुरताजबंद व चाकूर उपविभागात बुधवारी (दि.१७ जून) सकाळी ११ ते दुपारी १२ वाजेदरम्यान स्मार्ट मीटर संदर्भात ग्राहक समाधान मेळावा घेण्यात येणार आहे.
महावितरणने सर्व ग्राहकांना संबंधित उपविभाग स्तरावर आयोजित करण्यात येणाऱ्या ग्राहक समाधान मेळाव्यांना उपस्थित राहून स्मार्ट मीटरबाबत प्रत्यक्ष माहिती घेण्याचे आवाहन केले आहे.
