“बनावट प्रमाणपत्रांनी शिक्षण व्यवस्थेचा गळा घोटला – युवासेना म्हणते, ‘आता हिशेब द्या!’”

खोट्या प्रमाणपत्रांवरून नोकऱ्या मिळवणाऱ्यांवर एसआयटी चौकशीची मागणी; “२० टक्के राजकारण, ८० टक्के समाजकारण” या बाळासाहेबांच्या शिकवणीचा युवासेनेचा वारसा

लातूर | प्रतिनिधी

राजकारण हे समाजकारणाचे साधन आहे, ही जुनी शिकवण आज धुळीस मिळालेली दिसते. स्वार्थाच्या राजकारणाने समाजसेवेच्या संकल्पनांना झाकोळले आहे. समाजकारणाच्या नावाखाली पोळी भाजणारे अनेक “महाभाग” राज्यभर दिसत आहेत. कार्यकर्त्यांनी स्वतःचा स्वार्थ जोपासण्यासाठी समाजसेवेचा बुरखा पांघरला आहे, तर नेते मंडळी या सगळ्यावर “हसून वेळ मारून नेतात.”

परंतु या ढोंगी वातावरणात, हिंदूरुदयसम्राट बाळासाहेब ठाकरे यांच्या शिकवणीवर चालणारी युवासेना पुन्हा समाजकारणाला अग्रस्थानी आणण्यासाठी उभी राहिली आहे. “८० टक्के समाजकारण आणि २० टक्के राजकारण” — या मंत्रानुसार लातूर जिल्ह्यात युवासेनेच्या वतीने “खोट्या प्रमाणपत्र धारकांविरुद्ध सत्यशोध मोहीम” राबवली जात आहे.

लातूर जिल्ह्यात मोठ्या प्रमाणावर खोट्या प्रमाणपत्रांचा वापर?

युवासेनेचे जिल्हा प्रमुख अॅड. राहुल राघवेंद्रराव मातोळकर यांनी जिल्हा परिषद सीईओंकडे निवेदन देत म्हटले आहे की,

“गेल्या वीस वर्षांपासून अनुदानित तसेच जिल्हा परिषद शाळांमध्ये भूकंपग्रस्त, प्रकल्पग्रस्त, अपंग, जातीचे बनावट प्रमाणपत्र वापरून मोठ्या प्रमाणावर शिक्षक भरती झाल्याचा संशय आहे.”

अनेक शिक्षकांचे जात वैधता प्रमाणपत्र (Validity) अद्याप मंजूर झालेले नाही, तरीही ते नोकरीत आहेत — हे गंभीर असून, जिल्ह्यातील शिक्षणव्यवस्थेवर प्रश्नचिन्ह निर्माण करणारे आहे.

नागपूरच्या शिक्षण भरती घोटाळ्याचा धागा लातूरपर्यंत

नागपूर जिल्ह्यातील अलीकडील शिक्षण भरती घोटाळा राज्यभर चर्चेत आहे. त्या प्रकरणावर SIT चौकशी सुरू असून, मोठ्या प्रमाणावर खोट्या प्रमाणपत्रधारकांची नावे समोर आली आहेत.
याच धर्तीवर लातूर जिल्ह्यातही अशीच चौकशी समिती नेमावी, दोषी अधिकारी व शिक्षकांवर कायदेशीर कारवाई व्हावी, अशी युवासेनेची मागणी आहे.

“राजकारणाचा बुरखा उतरवायलाच हवा” – युवासेनेचा इशारा

युवासेनेने स्पष्ट इशारा दिला आहे की,

“जर प्रशासनाने चौकशीस विलंब केला, तर लातूर जिल्ह्यात युवकांना न्याय मिळवून देण्यासाठी तीव्र आंदोलन उभारले जाईल.”

ही केवळ लातूरपुरतीच नाही, तर राज्यातील सर्व जिल्ह्यांमधील भ्रष्ट प्रमाणपत्रांचा शोध घेण्यासाठी राज्यव्यापी मोहिमेची सुरुवात होणार असल्याचे संकेत मिळत आहेत.

राज्याच्या शिक्षण क्षेत्रात “सत्यशोधक” चळवळीची नवी पहाट?

आज शिक्षण क्षेत्रात भ्रष्टाचार, बनावट दस्तऐवज आणि राजकीय हस्तक्षेप वाढला आहे. अशा परिस्थितीत युवासेनेची ही कारवाई समाजात नवा संदेश देणारी ठरू शकते.
समाजात प्रत्येकजण आपल्या पोटाच्या प्रश्नात गुरफटलेला असला, तरी भ्रष्टाचाराविरुद्धचा हा आवाज “समाजकारणाच्या पुनर्जागरणाची सुरुवात” ठरू शकतो.

लातूरचा संदेश, महाराष्ट्रासाठी दिशा

“खोट्या प्रमाणपत्रावर उभी असलेली व्यवस्था उध्वस्त करणारच” — युवासेनेचा ठाम निर्धार.

राज्यभरात राजकारणाचा बाजार मांडला असताना, लातूर जिल्ह्यातील युवासेनेने पुन्हा एकदा राजकारणाऐवजी समाजकारणाचा झेंडा उंचावला आहे.
ही मोहीम यशस्वी झाली, तर महाराष्ट्रातील भ्रष्ट शिक्षण व्यवस्थेला खऱ्या अर्थाने धक्का बसणार आहे — आणि समाजकारणाचे खरे धडे पुन्हा एकदा लोकांपर्यंत पोहोचणार आहेत.