🚨 पुन्हा एकदा प्रियदर्शिनी सुतगिरणीचा घोटाळा उजेडात!“जिनिग” सुरूच नाही, पण समाजकल्याण विभागाकडून पुन्हा कोट्यवधींची उधळपट्टी!

लातूर | प्रतिनिधी

राज्यातील सर्वात गाजलेल्या सुतगिरणी घोटाळ्यांपैकी एक म्हणून ओळखल्या जाणाऱ्या प्रियदर्शिनी अनुसूचित जाती सहकारी सुतगिरणी मर्या., लातूर या संस्थेचे प्रकरण पुन्हा चर्चेत आले आहे. तब्बल १२ कोटी ३८ लाख ७३ हजार रुपयांच्या गहाणखताच्या नोंदी नव्याने महसूल नोंदवहीत दाखल झाल्याने अनेक प्रश्न उपस्थित होत आहेत.

मौजे महापूर (ता. लातूर) येथील गट क्रमांक ३७, ४१, ४३, ४४, ४५, ४६, ४७, ५०, ५२, ५३, ५५, ५७, ७०, ७३/३ या जमिनीवर सुतगिरणीच्या नावावर पुन्हा बोजा नोंदविण्यात आला आहे. संबंधित नोंदणी संचालक समाजकल्याण विभाग, महाराष्ट्र राज्य, पुणे यांच्या नावाने करण्यात आली आहे.

विशेष म्हणजे — हीच सुतगिरणी जवळपास दोन दशकांपूर्वीच “कधीच सुरू न झालेली” म्हणून कुप्रसिद्ध झाली होती! तत्कालीन मुख्यमंत्री विलासराव देशमुख यांनाही या प्रकरणामुळे विधानसभेत क्षमायाचना करावी लागली होती. २००० ते २००९ दरम्यान या सुतगिरणीला सामाजिक न्याय विभाग, सांस्कृतिक कार्य विभाग, आणि विशेष सहाय्य विभागाकडून कोट्यवधींच्या मंजुरी देण्यात आल्या, पण प्रत्यक्षात उत्पादनाचा एक धागाही गिरणीने कधी ओढला नाही.

तरीही आज पुन्हा तीच संस्थाच “पात्र” ठरत आहे आणि नव्या गहाणखताच्या नोंदींसाठी समाजकल्याण विभागाकडून मान्यता दिली जाते, ही बाब धक्कादायक आणि संशयास्पद आहे.

🔥 प्रश्नांची झळाळती मालिका :

• ज्यांच्या विरुद्ध पूर्वी शासन तपास, चौकशा आणि हडपशाहीची तक्रारी झाल्या, त्या संस्थेला आजही शासन निधी कसा?
• “प्रियदर्शिनी सुतगिरणी”ने अद्याप शासनाचे जुने कर्ज फेडलेले नाही, तरी नव्या बोज्यांची नोंद का केली जाते?
• समाजकल्याण विभागातील अधिकारी आणि स्थानिक राजकीय आश्रयदाते कोण?

माहितीनुसार, सहाय्यक आयुक्त समाजकल्याण लातूर कार्यालयाकडूनच (पत्र क्र. JAC/SAASKALA/SUTGIRNI/PRIYADARSHINI/SATBARA/BOJA/2025-26-5017, 5018 दि. 01/10/2025) या बोज्यांच्या नोंदी दाखल केल्या गेल्या आहेत.

स्थानिक नागरिक, तक्रारदार आणि काही सामाजिक कार्यकर्त्यांनी या नव्या फेरफारावर आक्षेप घेत भ्रष्टाचाराचा “पुनरावृत्ती प्रयोग” म्हणून टीका केली आहे.

एका माजी अधिकाऱ्याच्या शब्दात —

“जिनिग कधीच सुरू झाली नाही, पण गहाणखते मात्र वर्षानुवर्षे चालू आहेत. शासन निधीचा हा विनियोग नव्हे, तर विनाश आहे!”

राज्यात सत्तेवर असलेल्या देवेंद्र फडणवीस यांच्या सरकारकडे आता सर्वांचे लक्ष लागले आहे —
प्रियदर्शिनीचा हा काळा अध्याय पुन्हा उघडणार की पुन्हा एकदा फाईल दाबून ठेवली जाणार?