🚨 आचारसंहितेचा भंग करणाऱ्यांवर प्रशासनाचा थेट प्रहार!

🔥 लातूर निवडणुकीत भरारी पथकाची धडक कार्यवाही

❌ विनापरवाना प्रचारावर गुन्हे दाखल

🍾 १४६२ लिटर दारू जप्त – मतदार फोडण्याचा डाव उघड

👮‍♂️ ४०९ जणांवर कारवाई – शहर पोलिसांच्या ताब्यात!

लातूर (प्रतिनिधी):-
लातूर महानगरपालिका निवडणुकीत आचारसंहितेला हरताळ फासणाऱ्या राजकीय पक्ष, नेते आणि उमेदवारांची आता गय नाही, असा थेट संदेश देत प्रशासनाने भरारी पथकाच्या माध्यमातून जोरदार कारवाईचा सपाटा सुरू केला आहे. विनापरवाना होर्डिंग व बॅनर लावून नियम पायदळी तुडवणाऱ्यांवर थेट ०२ गुन्हे दाखल करण्यात आले असून, पुढील कारवाईसाठी यंत्रणा सज्ज असल्याचे स्पष्ट झाले आहे.

निवडणुकीच्या नावाखाली शहरभर सभा, मिरवणुका, वाहन रॅली, भिंतीवर पोस्टरबाजी, रस्त्यांवर झेंडेबाजी सुरू असून, कायदे धाब्यावर बसवून प्रचार केला जात असल्याचे उघड झाले आहे. यावर FST व VST पथकांनी सापळा रचत कारवाई केली असून, नियम मोडणाऱ्यांची यादी प्रशासनाकडे तयार आहे.

दरम्यान, मतदारांवर प्रभाव टाकण्यासाठी दारूचा साठा खुलेआम फिरत असल्याचा धक्कादायक प्रकार समोर आला आहे. पोलीस व राज्य उत्पादन शुल्क विभागाने संयुक्त धडक कारवाई करत २६.९ लाख रुपयांची १४६२.२५ लिटर दारू जप्त केली आहे. ही दारू नेमकी कुणासाठी होती, याची चौकशी आता वेगात सुरू आहे.

शहरात तणाव निर्माण होऊ नये म्हणून ४०९ संशयित व उपद्रवी व्यक्तींवर प्रतिबंधात्मक कारवाई करण्यात आली असून, कायदा व सुव्यवस्था बिघडवणाऱ्यांवर थेट कारागृहाचा रस्ता दाखवला जाणार असल्याचा इशारा देण्यात आला आहे.

उपजिल्हाधिकारी तथा आचारसंहिता कक्ष प्रमुख श्रीमती आम्रपाली कासोदेकर यांनी स्पष्ट शब्दांत आदेश दिले असून,

“आचारसंहितेचा भंग करणाऱ्यांवर कोणताही दबाव, ओळख किंवा राजकीय हस्तक्षेप चालणार नाही. नियम तोडाल तर थेट कारवाई!”
असा कडक इशारा दिला आहे.

प्रशासनाने सर्व राजकीय पक्ष व अपक्ष उमेदवारांना शेवटचा इशारा दिला असून, नियम मोडल्यास गुन्हे, जप्ती, अटक आणि निवडणूक खर्चाची तपासणी अटळ असल्याचे स्पष्ट केले आहे. नागरिकांनीही अशा प्रकारांची माहिती देऊन भयमुक्त निवडणूक घडवून आणण्यासाठी पुढाकार घ्यावा, असे आवाहन करण्यात आले आहे.

⚠️ लातूरमध्ये निवडणूक लढवायची असेल तर नियम पाळा — अन्यथा भरारी पथकाची कारवाई अटळ!