दिल्ली (विशेष प्रतिनिधी):
भारतीय भाषांचा प्रचार, प्रसार आणि संवर्धन करण्यासाठी कार्यरत असलेल्या विश्व हिंदी परिषद या प्रतिष्ठित संस्थेने लातूरचे लोकप्रिय माजी खासदार, संसदरत्न प्रा. डॉ. अॅड. सुनील बळीराम गायकवाड यांची दिल्ली प्रांताच्या संरक्षकपदी नियुक्ती केली आहे. याबाबतची अधिकृत माहिती परिषदचे राष्ट्रीय महासचिव डॉ. विपिन कुमार यांनी पत्राद्वारे दिली.
विश्व हिंदी परिषद ही संस्था देशात आणि परदेशात हिंदी भाषेचा प्रचार-प्रसार करण्यासाठी तसेच भारतीय भाषांचे महत्त्व अधोरेखित करण्यासाठी व्यापक स्तरावर कार्य करत आहे. हिंदी भाषेला जागतिक स्तरावर प्रतिष्ठा मिळवून देणे आणि भारतीय भाषांच्या माध्यमातून सांस्कृतिक एकात्मता बळकट करणे हा संस्थेचा प्रमुख उद्देश आहे.
प्रा. डॉ. सुनील बळीराम गायकवाड यांनी सार्वजनिक जीवनात उल्लेखनीय कार्य केले आहे. ते १६ व्या लोकसभेचे सदस्य राहिले आहेत. आपल्या संसदीय कार्यकाळात त्यांनी अनेक महत्त्वाच्या समित्यांमध्ये सक्रिय भूमिका बजावली. विशेषतः भारत सरकार गृह मंत्रालय अंतर्गत स्थापन करण्यात आलेल्या राजभाषा संसदीय समितीचे सदस्य म्हणून तसेच दुसऱ्या उपसमितीचे कार्यकारी संयोजक म्हणून त्यांनी हिंदी भाषेच्या प्रसारासाठी उल्लेखनीय कार्य केले.
साहित्य क्षेत्रातही डॉ. गायकवाड यांचे मोठे योगदान आहे. हिंदी, इंग्रजी, मराठी आणि गुजराती या भाषांमध्ये त्यांनी ९० हून अधिक पुस्तके लिहिली आहेत. इतिहास, समाज, राजकारण, भारतीय संस्कृती आणि सामाजिक समरसता अशा विविध विषयांवर त्यांनी लेखन केले आहे. हिंदी भाषा आणि साहित्य क्षेत्रातील त्यांच्या या व्यापक कार्याची दखल घेऊन विश्व हिंदी परिषद यांनी त्यांची दिल्ली प्रांताच्या संरक्षकपदी नियुक्ती केली आहे.
डॉ. गायकवाड यांच्या या नियुक्तीबद्दल वरिष्ठ प्रचारक इंद्रेश कुमार, माजी केंद्रीय गृहराज्यमंत्री अजय कुमार मिश्र, विश्व हिंदी परिषद चे राष्ट्रीय अध्यक्ष, पद्मश्री व पद्मभूषण सन्मानित माजी खासदार यार्लगड्डा लक्ष्मी प्रसाद, राष्ट्रीय उपाध्यक्ष देवी प्रसाद मिश्र, दिल्ली प्रदेश कार्यकारिणी उपाध्यक्ष अभिलाषा मिश्रा तसेच राष्ट्रीय महासचिव डॉ. विपिन कुमार यांसह अनेक मान्यवरांनी त्यांचे अभिनंदन केले आहे.
डॉ. गायकवाड यांच्या मार्गदर्शनाखाली हिंदी भाषेचा प्रचार-प्रसार आणि भारतीय भाषांचे संवर्धन अधिक प्रभावीपणे होईल, असा विश्वास व्यक्त करण्यात येत आहे.
