महावितरण मध्ये विविध उपक्रमाने अभियंता दिन उत्साहात साजरा
लातूर, (प्रतिनिधी): अभियंता दिनानिमित्त महावितरणच्या वतीने लातूर परिमंडळातील विविध कार्यालये तसेच शाळा-महाविद्यालयांमध्ये ऊर्जा बचत, हरित ऊर्जा, वीज सुरक्षा आणि अभियंत्यांच्या सामाजिक योगदानाबाबत जनजागृतीपर विविध उपक्रम घेऊन अभियंता दिन उत्साहात साजरा करण्यात आला.
अभियंता दिनानिमित्त हॉटेल अनिलच्या सभागृहात (दि.१५) प्रभारी कार्यकारी अभियंता शैलेश पाटील (विभागीय कार्यालय, लातूर), महेंद्र चुनारकर (उपमुख्य औद्योगिक संबंध अधिकारी, परिमंडळ कार्यालय, लातूर), सतीश कुलकर्णी (कार्यकारी अभियंता, चाचणी विभाग, लातूर), अशोक पेरकर (व्यवस्थापक, मानव संसाधन), बालाजी शिवलकर (अतिरिक्त कार्यकारी अभियंता, विभागीय कार्यालय, निलंगा) तसेच सुहास मिसाळ (उपकार्यकारी अभियंता, मंडळ, लातूर) यांच्या प्रमूख उपस्थितीत आयोजित कार्यक्रमात बोलताना अधीक्षक अभियंता प्रशांत दाणी यांनी अभियंत्यांना महापुरुषांचे विचार केवळ स्मरणात न ठेवता ते आचरणात आणण्याचे आवाहन केले. ते म्हणाले, “कामात निरंतरता असली पाहिजे. कोणत्या कामाला प्राधान्य दिले पाहिजे, हे आपल्याला ठरविता आले पाहिजे. मोठ्या व्यक्तींची केवळ पूजा करून भागणार नाही, तर त्यांच्या कार्यातील गुण आत्मसात करून आपल्या कामात त्यांचा उपयोग केला पाहिजे. स्पष्ट लक्ष्य निर्धारित करून त्याच्या दिशेने सातत्याने काम करणे आवश्यक आहे असे सांगत विजेची गरज लक्षात घेता ग्राहकाभिमूख सेवा प्रदान करण्याचे आवाहन श्री दाणी यांनी अध्यक्षीय समारोप करताना केले.
१५ सप्टेंबर हा भारतरत्न सर मोक्षगुंडम विश्वेश्वरय्या यांच्या जयंतीनिमित्त अभियंता दिन म्हणून साजरा केला जातो. देशाच्या विकासात अभियंत्यांची भूमिका अत्यंत महत्त्वाची असून पायाभूत सुविधा, उद्योग, ऊर्जा, तंत्रज्ञान, जलव्यवस्थापन, दळणवळण आणि पर्यावरणपूरक विकासामध्ये अभियंते महत्त्वपूर्ण योगदान देत आहेत. विश्वेश्वरय्या यांनी आपल्या दूरदृष्टी, शिस्त, कार्यनिष्ठा आणि तांत्रिक कौशल्यातून देशाच्या विकासाचा आदर्श निर्माण केला. त्यांच्या कार्यातून प्रेरणा घेऊन आधुनिक अभियंत्यांनी ज्ञान, कौशल्य, नवकल्पना आणि सामाजिक बांधिलकी यांचा समन्वय साधण्याची गरज असल्याचे अतिरिक्त कार्यकारी अभियंता शैलेश पाटील यांनी यावेळी बोलताना सांगीतले.
शाळा-महाविद्यालयांमध्ये ऊर्जा बचत व हरित ऊर्जेचा संदेश
अभियंता दिनाचे औचित्य साधून महावितरणच्या वतीने विविध शाळा व महाविद्यालयांमध्ये ऊर्जा बचत, वीजेचा कार्यक्षम वापर, अक्षय ऊर्जा, सौर ऊर्जा आणि हरित ऊर्जेचे महत्त्व याबाबत विद्यार्थ्यांमध्ये जनजागृती करण्यात आली. विद्यार्थ्यांना विजेची बचत करण्याच्या विविध उपाययोजना, अनावश्यक विद्युत उपकरणे बंद ठेवणे, ऊर्जा कार्यक्षम उपकरणांचा वापर करणे तसेच सौर ऊर्जेसारख्या स्वच्छ ऊर्जास्रोतांचा स्वीकार करण्याबाबत महावितरणच्या अभियंत्यांनी मार्गदर्शन केले.
वीज निर्मितीपासून तिचा कार्यक्षम वापर आणि भविष्यातील शाश्वत ऊर्जा व्यवस्था उभारण्यापर्यंत अभियंत्यांची भूमिका स्पष्ट करत विद्यार्थ्यांना “ऊर्जा बचत हीच ऊर्जा निर्मिती” आणि “हरित ऊर्जा—शाश्वत भविष्यासाठी आवश्यक ऊर्जा” हा संदेश देण्यात आला. या उपक्रमांमुळे विद्यार्थ्यांमध्ये ऊर्जा संवर्धनाबाबत जागरूकता निर्माण करण्यासोबतच अभियंता क्षेत्राविषयीही सकारात्मक दृष्टिकोन निर्माण करण्याचा प्रयत्न करण्यात आला.
कार्यक्रमाचे सूत्रसंचालन व प्रास्ताविक अभियंता सुहास मिसाळ यांनी केले, तर अभियंता अमरनाथ स्वामी यांनी आभार प्रदर्शन केले.
