“शिक्षण हेच शक्तीचे साधन आहे, आणि या विद्यार्थिनींचा प्रवास हे याचे उत्तम उदाहरण आहे.”
लातूर जिल्ह्यातील देवणी या ग्रामीण भागातील महिलांच्या सशक्तीकरणासाठी एक महत्त्वपूर्ण पाऊल उचलण्यात आले असून, देवणी, लातूर येथील विद्यार्थिनींनी स्वयंस्किल्स कोर्स यशस्वीरीत्या पूर्ण केला आहे. हा कोर्स ग्रामीण महिला विकास संस्था यांच्या नेतृत्वाखाली, जगमंगल सोशल फाउंडेशन यांच्या मार्गदर्शनाखाली आणि स्विस-एड इंडिया तसेच युरोपियन युनियन यांच्या विशेष सहकार्यातून राबवण्यात आला.
या उपक्रमाचा उद्देश “लैंगिक अत्याचार व भेदभावाचा सामना करणे, विशेषतः घरगुती हिंसा आणि बालविवाह” या समस्यांवर लक्ष केंद्रित करून महिलांना सक्षम बनवणे हा होता.
स्वयंतेज अकादमी-लातूर द्वारे राबवलेला हा कोर्स मुलींना संवाद कौशल्य, इंग्रजी बोलणे, एम.एस. ऑफिस, इंटरनेट प्रावीण्य, जीवन कौशल्ये यामध्ये प्रावीण्य मिळवून देण्यासाठी तयार करण्यात आला होता.
विद्यार्थिनींनी या कोर्समध्ये नियमित उपस्थिती, सक्रिय सहभाग, आणि अभ्यासातील उत्कटता यांचे उदाहरण घालून दिले. विद्यार्थिनींनी आत्मसात केलेले इंग्रजी कौशल्य उपस्थितांसमोर सादर केले आणि उपस्थितांनी टाळ्यांच्या गजरात त्यांचे कौतुक केले. १२ दिवस आणि १८ तासांच्या प्रशिक्षणात स्वयंतेज अकादमीच्या प्रशिक्षकांनी विद्यार्थिनींना घडवले. याबद्दल सर्व मान्यवर आणि विद्यार्थिनींच्या पालकांनी प्रशिक्षकांचे विशेष अभिनंदन केले.
विद्यार्थिनींच्या समर्पण आणि चिकाटीमुळे त्या भविष्यात नक्कीच सक्षम आणि आत्मनिर्भर बनतील, असा विश्वास उपस्थित मान्यवरांनी व्यक्त केला.
यावेळी विविध मान्यवरची उपस्थिती लाभली. या कार्यक्रमाचे अध्यक्ष राणी भंडारे (सरपंच, देवणी) होत्या. उद्घाटन माणिक डोके (पोलीस निरीक्षक, देवणी) यांच्या हस्ते झाले. प्रमुख पाहुणे म्हणून तेजस गुजराथी (संस्थापक संचालक, जगमंगल सोशल फाउंडेशन) उपस्थित होते. याशिवाय कुशावर्ता बेळे (संचालक, ग्रामीण महिला विकास संस्था), कचराताई गायकवाड (संचालक, ग्रामीण महिला विकास संस्था), गिरीश सबनीस (प्रकल्प समन्वयक), आकाश सोनकांबळे (संचालक, स्वयंतेज अकादमी लातूर), बाबासाहेब उमाटे (पत्रकार, दैनिक सकाळ) आणि प्रशिक्षक अर्पिता बिराजदार, रेणुका होनकर, सुर्योदय बोईनवाड हे मान्यवर देखील उपस्थित होते.
विद्यार्थिनीं त्यांच्या भावना व्यक्त केल्या. स्नेहा पाटील हिने आपली भावना व्यक्त करताना सांगितले, “माझ्या आयुष्यात कधीच असा कोर्स करेन असे वाटले नव्हते. आज मी इंग्रजी बोलू शकते यावर माझा विश्वास बसत नाही. आधी मी संगणक फक्त झेरॉक्स दुकानात पाहिला होता, पण या कोर्समुळे मी स्वतः लॅपटॉप हाताळला आणि वापरला. माझं स्वप्न पूर्ण झालं आहे. यासाठी मी जगमंगल सोशल फाउंडेशन, ग्रामीण महिला विकास संस्था, स्विस-एड इंडिया, युरोपियन युनियन आणि स्वयंतेज अकादमी यांचे मनापासून आभार मानते.”
संस्कृती बिरादार हिने इंग्रजीमध्ये आपल्या कुटुंबाबद्दल आणि मित्रांबद्दल सादरीकरण केले. तिने कोर्समधून काय शिकलं हे सर्व उपस्थितांसमोर सांगितलं आणि तिच्या आत्मविश्वासपूर्ण सादरीकरणावर उपस्थितांनी टाळ्यांच्या गजरात तिचे कौतुक केले.
मोनिका बिरादार हिने सांगितले, “मी कधी १५ ते २० किलोमीटर प्रवास करून शिकेन असे वाटले नव्हते. सुरुवातीला माझ्या कुटुंबाने या प्रशिक्षणासाठी विरोध केला होता, पण ग्रामीण महिला विकास संस्था यांच्या मदतीने माझे कुटुंब तयार झाले. आज मी स्वतःला इंग्रजीत सादर करत आहे, याचा मला खूप आनंद आहे. यासाठी मी स्वयंतेज अकादमीच्या प्रशिक्षकांचे आभार मानते.”
मान्यवरांनि आपले मनोगत व्यक्त केले माणिक डोके यांनी विद्यार्थिनींना मार्गदर्शन करताना सांगितले, “महिलांनी केवळ शिक्षण घेऊन थांबू नये, तर समाजातील अन्याय आणि भेदभावाविरोधात उभं राहावं.”
राणी भंडारे (सरपंच) यांनी आपल्या भाषणात सांगितले, “मुलींनी शांत न राहता पुढे आले पाहिजे आणि विविध कौशल्ये आत्मसात केली पाहिजेत. हा उपक्रम ग्रामीण भागातील मुलींना सक्षम करण्यासाठी मोलाची भूमिका बजावतो.”
कुशावर्ता बेळे यांनी सांगितले, “आम्ही बालविवाह, लैंगिक अत्याचार, भेदभाव आणि घरगुती हिंसेविरोधात कार्य करत आलो आहोत. पण जेव्हा आम्ही आकाश सर आणि तेजस सर यांना भेटलो आणि अच्युत बोरगावकर यांच्या विशेष मार्गदर्शनामुळे, आम्ही आणि जगमंगल सोशल फाउंडेशन ने पुढाकार घेऊन हा कोर्स सुरू केला. या कोर्ससाठी आसपासच्या १० गावांमधील ६० मुलींनी सहभाग घेतला आणि त्यांच्या चेहऱ्यावरचे आनंदाचे हास्य पाहून आम्हाला खूप समाधान वाटत आहे.”
तेजस गुजराथी यांनी या कोर्सच्या निर्मिती प्रक्रियेबद्दल सांगितले आणि विद्यार्थिनींना आपली मनोगते व्यक्त करण्यासाठी प्रोत्साहित केले.
उपस्थिताकडून सर्व विद्यार्थिनींना त्यांच्या पुढील वाटचालीसाठी आणि यशासाठी हार्दिक शुभेच्छा देण्यात आल्या.
