💧 लातूरच्या पाण्यावर खुलेआम दरोडा!मांजरा प्रकल्पातून येणाऱ्या पाईपलाईनला गळती – लाखो लिटर पाणी चोरीला!

✍️ विशेष दिपरत्न निलंगेकर | लातूर | दि. १८ जून

लातूरकरांसाठी जीवशक्ती असलेल्या मांजरा प्रकल्पातून येणाऱ्या पाणीपुरवठा पाईपलाईनवर आज पाणीचोरांचा अक्षरशः कब्जा झाला आहे. शहराला आठ-नऊ दिवसांतून एकदाच पाणी मिळते, आणि दुसरीकडे पाईपलाईनवरील अनेक ठिकाणी व्हॉल्व्ह फोडून थेट नळ कनेक्शन घेतले जात आहे. हे सर्व महापालिकेच्या नजरेआड होतंय की जाणिवपूर्वक दुर्लक्षित? असा सवाल आता नागरिक विचारू लागले आहेत.

🔴 पाणीटंचाईग्रस्त लातूर, पण काहीजणांना २४ तास फुकट पाणी!

धनेगाव (जि. बीड) येथील मांजरा प्रकल्पातून १९९५ पासून लातूरला पाणीपुरवठा सुरू झाला. मात्र आजही लातूरकरांना प्रत्येक आठवड्याला केवळ एकदाच पाणी मिळते. याउलट, पाईपलाईनच्या मार्गातील अनेक गावांमध्ये, विशेषतः रांजणीसारख्या ठिकाणी थेट पाइपलाईन फोडून शेतीसाठी नळ जोडले गेलेत.

मात्र लातूरकरांनी कसले पाप केलंय? असा संतप्त सवाल आता नागरिक विचारत आहेत.

💦 लाखो लिटर पाणी चोरी व वाया जाण्याचा गंभीर प्रकार

महापालिकेच्या दुर्लक्षामुळे दररोज लाखो लिटर पाणी वाया जातंय. काही ठिकाणी लोखंडी फ्रेम बसवून संरक्षण केलं असलं तरी हेही तोडून थेट नळजोडणी करण्यात आली आहे. पाईपलाईनवरील व्हॉल्व्ह फोडून शेतीसाठी पाणी चोरलं जातं, आणि महापालिकेचे कर्मचारी ‘बघ्याची भूमिका’ घेतात.

📉 महिना ४ वेळा पाणी, पण धरणात 60% साठा!

सध्या मांजरा प्रकल्पात ६० टक्केहून अधिक साठा उपलब्ध असून त्यातील २७.९७% पाणी उपयुक्त आहे. तरीही महिना फक्त ४ वेळाच पाणी का? कारण लातूरकडे येणाऱ्या पाण्यातून अनेक ठिकाणी गळती, चोरी, अनधिकृत वापर यामुळे लातूरला मिळणारे पाणी दरम्यानच वाया जाते.

🛠️ महापालिकेची जबाबदारी कुठे?

महापालिकेचे कर्मचारी व अधिकाऱ्यांनी या पाईपलाईनची पाहणी महिनोन्‌महिने केलीच नाही. आणि केली असेल, तर ती पाहणी फक्त खानापूर्तीसाठीच. त्यामुळे आज नागरिकांच्या मनात शंका आहे की, या पाणीचोरीला कुणाचं तरी मूक समर्थन आहे काय?

🚨 चोरी करणाऱ्यांवर गुन्हे दाखल करणार का?

सार्वजनिक पाणीपुरवठा योजनेतून अनधिकृतपणे पाणी घेणं हे कायद्याने गुन्हा आहे. मात्र आजवर एकाही चोरावर कारवाई झालेली नाही. त्यामुळेच नागरिक विचारत आहेत:

“महापालिका पाणी चोरांवर गुन्हे दाखल करणार का? की फक्त बघ्याची भूमिका घेत बसणार?”

📣 लातूरकरांचा आवाज: चौकशी करा, कारवाई करा!

सतत पाणीटंचाई सहन करणाऱ्या लातूरकरांनी आता प्रशासनाला इशारा दिला आहे:

“धनेगाव ते लातूर पाईपलाईनची सखोल चौकशी करा!
वाल्व्हवरील चोरी थांबवा! दोषींवर कारवाई करा!
अन्यथा तीव्र जनआंदोलन उभं राहील!“

“कुंपणच शेत खाते” ही म्हण आज लातूरच्या पाणी व्यवस्थापनावर तंतोतंत लागू होते. धरणात पाणी आहे, लाईन आहे, नागरिक आहेत – पण पाणी मात्र अनधिकृत हातातच आहे. लातूरच्या पाण्याचा हा दरोडा थांबवण्यासाठी आता कठोर निर्णय घेणं गरजेचं आहे – अन्यथा लातूरकरांचा संयम संपेल, आणि संघर्ष सुरू होईल!

📌 नागरिकांनो, जागे व्हा!
📞 पाणीचोरी दिसल्यास त्वरित संबंधित अधिकाऱ्यांना कळवा!
📢 प्रशासनाला जबाबदार धरा!