लातुरात मराठवाडा स्वाभिमान यात्रेचे भव्य आगमन

लातूर –
मराठवाड्याच्या विकासाच्या अनुशेषाचा डोंगर आता लाखो कोटींवर जाऊन ठेपला आहे. शेतकऱ्यांची दुर्दशा, उद्योगधंद्यातील मागासलेपणा, सिंचन योजनांचा ठप्प प्रवास आणि बेरोजगारीच्या छायेत दडपलेल्या तरुणाईची वेदना यांचा विस्फोट आता आंदोलनाच्या रूपाने उभा ठाकला आहे. याच पार्श्वभूमीवर शासनाचे लक्ष वेधण्यासाठी सोमवारी तुळजापूरहून छत्रपती संभाजीनगरकडे निघालेल्या मराठवाडा स्वाभिमान जागर यात्रेचे सायंकाळी लातूर शहरात उत्साहात स्वागत झाले.

शासकीय विश्रामगृहावर यात्रेचे आगमन होताच मराठवाडा जनता विकास परिषदेचे नवनिर्वाचित अध्यक्ष प्राचार्य डॉ. सोमनाथ रोडे, सचिव प्रा. अर्जुन जाधव, राष्ट्रवादी काँग्रेसचे अॅड. व्यंकट बेद्रे, काँग्रेसचे मोईजभाई शेख, मजविपचे महानगर अध्यक्ष जयप्रकाश दगडे आदी मान्यवरांनी यात्रेचे स्वागत करून पुढील लढ्यासाठी पाठबळ दिले.

यात्रेत धैर्यशील पाटील, धीरज पाटील, शाम पवार, विजय पाटील, शामलताई वडणे, भागवत वंगे, रमेश सोनवणे, निवृत्ती सूर्यवंशी, सतिश सुरवसे, भाजपचे हरिभाऊ काळे, अशोक सोनवणे, सतिश पाटील, शरद पाटील, रामराव सुतार, लिंबराज सूर्यवंशी, परमेश्वर सूर्यवंशी, सिध्देश्वर ढगे, बी.एम. कांबळे, अभायकुमार सोनवणे आदींसह शेकडो कार्यकर्त्यांचा सहभाग होता.

शहरात प्रवेश करताना युवकांच्या हाती झेंडे, घोषणांनी दुमदुमलेली रस्ते आणि “अनुशेषाचा हिशोब द्या”, “मराठवाड्याला न्याय द्या” अशा आरोळ्यांनी लातूरचे वातावरण भारावून गेले.

ऐतिहासिक अनुशेषाची बेरीज

यात्रेचे संयोजक नामदेवराव पाटील यांनी शासनाच्या उदासीनतेवर ताशेरे ओढताना स्पष्ट केले की –

• २ लाख ३५ हजार कोटी रुपयांचा अनुशेष आजही शासनाकडे थकलेला आहे.
• त्यात उद्योगाचा अनुशेष १.२५ लाख कोटी, कृषी अनुशेष २५ हजार कोटी, सिंचन अनुशेष ५५ हजार कोटी, तर अन्नप्रक्रिया उद्योग अनुशेष १० हजार कोटी इतका आहे.

“या अनुशेषातील फक्त २५ टक्के रक्कम मिळाली तरी मराठवाड्याचा चेहरामोहरा बदलेल; प्रत्येक तरुणाला रोजगार, प्रत्येक शेतजमीन ओलिताखाली आणि शेतमालाला हमीभावापेक्षा जास्त दर मिळेल,” असे ते म्हणाले.

मागण्यांचा जाहीरनामा

यात्रेच्या माध्यमातून शासनास पुढील ठोस मागण्या करण्यात आल्या –

• अतिवृष्टीग्रस्त शेतकऱ्यांना एकरी ५० हजार रुपयांची मदत.
• शेतकऱ्यांचे संपूर्ण कर्जमाफ.
• दर तीन महिन्यांनी मंत्रीमंडळाची बैठक मराठवाड्यात घ्यावी.
• मराठवाडा वैधानिक विकास महामंडळाची पुनर्स्थापना.
• लातूर–धाराशिव–बीड जिल्ह्यांसाठी उजनी धरणातून २१ टीएमसी पाणी.
• माहिती तंत्रज्ञान क्षेत्रात आयटी हबची स्थापना.
• शेतीमालावर प्रक्रिया करणाऱ्या उद्योगांना चालना आणि अनुदान.

लढ्याचा ऐतिहासिक वारसा

मराठवाडा मागासलेपणाविरुद्धचा लढा हा नवा नाही. स्वातंत्र्याच्या काळात निजामशाहीच्या बेड्या तोडून या भूमीने आपले अस्तित्व जपले. आता आर्थिक व सामाजिक विकासाच्या लढ्यातील हे नवे पाऊल तितकेच ऐतिहासिक ठरणार आहे. स्वाभिमान यात्रेच्या घोषणांनी आजच्या तरुणाईला जणू निजामविरुद्धच्या “मराठवाडा मुक्ती संग्रामाची” आठवण करून दिली.

यात्रेत सामील युवकांचा उत्साह आणि महिलांची उपस्थिती हा संघर्ष फक्त राजकीय नसून आर्थिक न्यायाच्या चळवळीचे रूप घेत असल्याचे चित्र स्पष्ट दिसत आहे.

अंतिम आवाहन

“अनुशेषाचा हिशोब देणे हे शासनाचे कर्तव्य आहे. हा लढा मराठवाड्याच्या अस्तित्वाचा आहे. आता तरुणाईने केवळ मागण्या करण्यावर न थांबता रस्त्यावर उतरून आपल्या हक्कासाठी एकदिलाने उभे राहावे,” असे आवाहन नामदेवराव पाटील यांनी केले.