लातूर : शिक्षण हीच समाजपरिवर्तनाची खरी शक्ती आहे, या विचाराने झोपडपट्टी व मागास भागातील विद्यार्थ्यांना शिक्षणाच्या मुख्य प्रवाहात आणण्यासाठी सातत्याने काम करणारे महात्मा गांधी उच्च माध्यमिक विद्यालय, सुळ गल्ली (लातूर) येथील राज्यशास्त्र विभाग प्रमुख प्रा. तानाजी विठ्ठलराव भोसले यांना “नॅशनल टीचर्स पुरस्कार २०२६” प्रदान करून गौरविण्यात आले.
पुणे येथील स्विफ्टन लिफ्ट एज्युकेशन मीडिया ग्रुपतर्फे आयोजित भव्य समारंभात भारतरत्न पंडित भीमसेन जोशी कला मंदिर, पुणे येथे हा सन्मान प्रदान करण्यात आला. शिक्षण, सामाजिक कार्य आणि पर्यावरण संवर्धन क्षेत्रात केलेल्या उल्लेखनीय कार्याची दखल घेत हा पुरस्कार प्रा. भोसले यांना देण्यात आला.
प्रा. भोसले यांनी अनेक वर्षांपासून झोपडपट्टी तसेच मागास भागातील दलित, मुस्लिम आणि मजुरी करणाऱ्या गोरगरीब कुटुंबातील मुलांना शिक्षणाच्या प्रवाहात आणण्यासाठी उल्लेखनीय कार्य केले आहे. शिक्षणाबरोबरच सामाजिक बांधिलकी जपत त्यांनी संत कबीर प्रतिष्ठानच्या माध्यमातून राष्ट्रभाषा हिंदीच्या प्रसारासाठी विविध उपक्रम राबविले. तसेच राष्ट्रीय हरित सेनेच्या माध्यमातून पर्यावरण संरक्षणाबाबत विद्यार्थ्यांमध्ये जनजागृती करण्याचे कामही त्यांनी सातत्याने केले आहे.
या कार्याची दखल घेत इंडियन आर्मीचे लेफ्टनंट कमांडर शीतल गायकवाड, येवले अमृततुल्यचे संस्थापक नवनाथ येवले, चाकण फेडरेशन इंडस्ट्रीचे चीफ एक्झिक्यूटिव्ह दिलीप बतवाल, भाजप महिला प्रदेशाध्यक्ष नेहा गोरे, भाजप पुणे शहर सरचिटणीस प्रियंका शेंडगे-शिंदे तसेच स्विफ्टन लिफ्टचे संस्थापक निलेश साबे यांच्या हस्ते प्रा. भोसले यांना पुरस्कार प्रदान करण्यात आला.
प्रा. तानाजी भोसले हे संत कबीर प्रतिष्ठान, लातूरचे नियामक मंडळ सदस्य, वसंतराव काळे शिक्षक पतसंस्थेचे माजी सचिव तसेच महाराष्ट्र राज्यशास्त्र कनिष्ठ महाविद्यालयीन परिषदेचे लातूर विभागीय सचिव म्हणूनही सक्रिय आहेत. शिक्षणाबरोबरच समाजाभिमुख कार्यातून त्यांनी विद्यार्थ्यांमध्ये सामाजिक जाणीव जागविण्याचे काम केले आहे.
या पुरस्काराबद्दल शिक्षक आमदार विक्रम काळे, संस्थेचे सचिव संभाजी सुळ, माजी महापौर दीपक सुळ, प्रा. अंकुश नाडे, डॉ. रणजीत जाधव, डॉ. सतीश यादव, प्राचार्य महादेव गव्हाणे, प्राचार्य बबन बोडके, डॉ. दिलीप गुंजरगे, श्री दीपक सलगर, श्री मदन धुमाळ, श्री गंगाधर आरडले, श्री दयानंद कांबळे, डॉ. हणमंत पवार, डॉ. मैनोद्दीन शेख, श्री तानाजी पाटील, डी.एस. ग्रुपचे तुकाराम भैय्या पाटील, श्री संतोष बिराजदार, प्रा. सुहास पाचपुते, प्रा. सुनील नावडे, प्राचार्य रामदास फेरे, प्राचार्य आर.डी. निटूरकर, पर्यवेक्षक संतोष गुरव, कवी रामदास कांबळे, डॉ. गणेश बेळंबे, प्राचार्य राजाराम भिसे, डॉ. अयुब पठाण, मुख्याध्यापक युवराज शिंदे, श्री सय्यद गफार यांसह अनेक मान्यवरांनी प्रा. भोसले यांचे अभिनंदन केले.
शिक्षण आणि समाजसेवेची सांगड घालत विद्यार्थ्यांच्या भवितव्यासाठी अखंड कार्य करणाऱ्या प्रा. तानाजी भोसले यांच्या या सन्मानामुळे लातूर जिल्ह्याच्या शैक्षणिक क्षेत्राचा गौरव वाढला असल्याची भावना यावेळी व्यक्त करण्यात आली.
