मौजे खरोळा येथे पार पडला स्तुत्य उपक्रम

खरोळा (ता. रेणापूर) : दयानंद शिक्षण संस्था संचलित, दयानंद विधी महाविद्यालय, लातूर व श्री दत्त मंदिर देवस्थान, खरोळा यांच्या संयुक्त विद्यमाने दि. ६ मार्च २०२६ रोजी खरोळा गावातील दत्त मंदिर येथे ‘कायदेविषयक जनजागृती शिबिर’ उत्साहात पार पडले. या शिबिराच्या माध्यमातून विद्यार्थ्यांनी विविध सामाजिक विषयांवर प्रबोधनपर कार्यक्रम सादर करून ग्रामस्थांमध्ये जागरूकता निर्माण केली.
दयानंद विधी महाविद्यालयाच्या विधी चिकित्सालयामार्फत आयोजित या शिबिरात एलएलबी द्वितीय वर्ष व बीए एलएलबी चतुर्थ वर्षाच्या विद्यार्थ्यांनी ‘वैकल्पिक वाद निवारण पद्धती’ (ADR) या प्रात्यक्षिक उपक्रमांतर्गत सक्रिय सहभाग नोंदवला. कार्यक्रमाचे प्रास्ताविक समन्वयक डॉ. शुभांगी पांचाळ यांनी केले.

कार्यक्रमादरम्यान विद्यार्थ्यांनी बालविवाह प्रतिबंध, स्त्रीभ्रूणहत्या प्रतिबंध, हुंडाबळी प्रथा प्रतिबंध यांसारख्या कायद्याअंतर्गत गंभीर सामाजिक समस्यांवर आधारित लघुनाटिका सादर केल्या. या नाटिकांमधून समाजातील चुकीच्या प्रथांचे दुष्परिणाम प्रभावीपणे मांडण्यात आले आणि त्याचे दंड याबाबत जागरूकता निर्माण करण्यात आली. तसेच अशा सामाजिक कु-प्रथांविरोधात समाजाने एकत्र येऊन लढा देण्याचा संदेश देण्यात आला.
यावेळी विद्यार्थ्यांनी गावातून जनजागृती रॅली काढून नागरिकांमध्ये कायदेविषयक जनजागृती केली.
या कार्यक्रमाला दत्त प्रतिष्ठानचे सचिव संजय राऊतराव, संचालक माधव बांदे, पंचायत समिती सदस्य प्रताप राऊतराव, विश्वनाथ कागळे, अमर देशमुख व बाबुराव देशमुख व इतर मान्यवरांची प्रमुख उपस्थिती होती.
यावेळी विश्वनाथ कागळे यांनी मनोगत व्यक्त करत दयानंद विधी महाविद्यालयाच्या विद्यार्थ्यांचे स्वागत केले. खरोळा गावाची निवड करून हा जनजागृती कार्यक्रम आयोजित केल्याबद्दल त्यांनी आयोजकांचे आभार मानले.
कार्यक्रमास खरोळा गावातील नागरिक मोठ्या संख्येने  उपस्थित होते.
विद्यार्थ्यांच्या सादरीकरणाला ग्रामस्थांनी उत्स्फूर्त प्रतिसाद दिला. सामाजिक प्रश्नांबाबत जनजागृती करण्याच्या दृष्टीने असे उपक्रम अत्यंत उपयुक्त ठरतात, असे मत उपस्थितांनी व्यक्त केले.
हे शिबिर, दयानंद शिक्षण संस्थेचे पदाधिकारी व महाविद्यालयाचे प्राचार्य डॉ. पूनम नथानी यांच्या मार्गदर्शनाखाली आयोजित करण्यात आले. कार्यक्रमाच्या यशस्वीतेसाठी प्रा. डॉ. शुभांगी पांचाळ व प्रा. रवींद्र शेट्टी, देवस्थानाचे उपाध्यक्ष श्री धनंजय देशमुख, ऍड. प्रीती भोसले, कार्यकर्ते व विद्यार्थी यांनी विशेष परिश्रम घेतले. तसेच प्रा. सत्तार शेख, प्रा. स्वाती पाटील, प्रा. शीतल गुट्टे, प्रा. शामराव पाटील व प्रा. मुस्तफा पठाण हे प्राध्यापक उपस्थित होते.