विजया फूड ची साता समुद्र पार भरारी…*यशस्वीनी…………..* 

लातूर येथील प्रभा कुमठेकर यांच्या विजया फुड्सचा लाडूंचा ब्रॅण्ड राज्यासोबतच परदेशातही पोहंचला

प्रत्येक यशस्वी पुरुषाच्या पाठीशी एका महिला खंबीरपणे उभी असते असे म्हटले जाते. त्याचप्रमाणे प्रत्येक यशस्वी महिलेच्या पाठीशी एक पुरुष खंबीरपणे उभा असतो हे सत्य ही नाकारता येत नाही. लातूर तालुक्यातील मौजे चिंचोली बल्लाळनाथ या छोट्याशा गावातील सौ. प्रभा प्रेमनाथ कुमठेकर या आज छोट्या उद्योगामधून एक यशस्वी उद्योजक म्हणून उभ्या राहिलेल्या आहेत. त्यासाठी त्यांना साथ लाभली ती कुटुंबीय आणि उमेदची टिम यांची.

            युवक, युवतींनी नौकरी च्या मागे न लागता उद्योग, व्यवसाय उभा करून स्वावलंबी व्हावे यासाठी शासनाने विविध योजना राबविल्या आहेत. परंतु लाभार्थी मात्र केवळ अनुदानावर डोळा ठेवून असतात.ते मिळाले की उद्योग ,धंदा बंद होतो.  एकमेका साह्य करू अवघे धरू सुपंथ हा सहकाराचा मुलमंञ पण तो सुद्धा अंमलात आणला केवळ मोजक्या व्यक्तींनी, संस्थांनी . बचत गट चळवळ सुरू झाली आणि यामधून काही उद्योजक उभे ही राहीले पण सातत्य, नाही. आज बचतगट उत्पादने म्हटली की डोळ्यासमोर येते पापड , लोणची, चटण्या, कुरडई, बाजरीच्या खारोड्या,  विणकामाच्या काही वस्तू, हळद, मिरची, मसाला, चिवडा . पण काहीतरी वेगळे करुन आपला ब्रँड निर्माण केला याची उदाहरणे बोटावर मोजता येतील एवढेच राज्यात असावी.                              लातूर तालुक्यातील मौजे चिंचोली बल्लाळनाथ येथील सौ.प्रभा प्रेमनाथ कुमठेकर यांनी बचतगटाच्या माध्यमातून आपला व्यवसाय उभा करण्याचा निर्धार केला. कुटुंबीयांनी त्यांना साथ दिली आणि गुळ शेंगदाणे लाडू त्या तयार करु लागल्या. श्री विघ्नहर्ता स्वयंसहाय्यता समूह याच्या माध्यमातून त्यांनी विजया फुड्स या नावाने आपला गुळ शेंगदाणा लाडूचा ब्रँड तयार केला.

बाजारातील लाडू मध्ये गुळाचे प्रमाण अधिक असते. शेंगदाणे वापरण्याऐवजी पेंडीचा वापर केला जातो. त्यामुळे हे लाडू कोणी सातत्याने घेत नाही. म्हणून त्यांनी शेंगदाणे आणि सेंद्रिय गुळाचे लाडू बनवले. २०१६ मध्ये गावात हा व्यवसाय सुरू झाला पण प्रतिसाद कमी मिळत असे. हाताने बनवायला भरपूर वेळ लागत असे.  लातूरच्या उमेद टिमने त्यांचे मनोबल वाढवले, उत्पादन विक्री करण्यासाठी बाजारपेठ मिळवून देण्यासाठी मदत केली. 

      उत्पादन चांगले होते पण विक्री चे तंञ नव्हते ते उमेदमुळे मिळाले.शेंगदाणा लाडू सोबत ड्राय फ्रुट लाडू बनवले आणि व्यवसाय वाढीस लागला. या लाडूंची मागणी वाढू लागली. बॅंकेने त्यांना सहकार्य केले आणि एक लाख पन्नास हजार रुपये कर्ज मंजूर केले. यातून त्यांनी लाडू बनवण्याची मशीन गुजरात मधील राजकोट येथून आणली. २०२४ मध्ये ही मशीन आणली आणि उत्पादनात वाढ झाली. जवळपास बॅंकेचे अर्धे कर्ज ही त्यांनी फेडलेले आहे. वर्षांची उलाढाल ही १२ ते १५ लाखापर्यंत होत आहे. सर्व खर्च वजा जाता किमान २० टक्के नफा राहतो. पुर्वी दहा किलो चे उत्पादन करण्यासाठी एक दिवस लागायचा. मशिनमुळे ते काम आता एका तासात केले जाते.  पुर्वी शेंगदाणे बाजारातून घरी आणायचे, त्याला भाजायचे, नंतर लाडू साठी वापरायचे पण आता भाजलेले तयार शेंगदाणे उपलब्ध होत आहेत त्यामुळे अतिरिक्त कामाच्या वेळेची बचत होते. 

            यशासाठी घेतलेले  कष्ट, जिद्द आणि चिकाटी यामुळे यश मिळतेच हे प्रभा कुमठेकर यांच्या उद्योगाच्या प्रगती वरुन लक्षात येते. चिंचोली बल्लाळनाथ गावात ही या लाडूंची मागणी वाढली आहे.तसेच जिल्ह्याचे ठिकाणी लातूर शहरात पण मागणी वाढली आहे. मोठ्या आॅर्डरपण आता मिळत आहेत. सोबतच मुखवास पण तयार केले जाते. आपल्याकडे जेवणानंतर किंवा नाष्ट्यानंतर बडीशोप खाल्ली जाते. त्याला मागणी चांगली आहे. त्यामुळे मुखवासचे उत्पादन सुरू केले आहे. 

       लवकरच मेथी लाडू , डिंक लाडू , राजगिरा लाडू , शुगर फ्री ड्रायफ्रुट लाडू असे लाडू चे वेगवेगळे ब्रॅण्ड तयार करण्यात येणार आहेत अशी माहिती ही सौ.प्रभा आणि त्यांचे पती प्रेमनाथ कुमठेकर यांनी दिली. 

        बचतगट उत्पादित उत्पादनाच्या विक्रीसाठी ठिकठिकाणी स्टाॅल लावले जातात. त्यामध्ये सक्रिय सहभाग घेतला. लातूर, बीड, नांदेड, बार्शी, ठाणे , नवी मुंबई, मुंबई अशा ठिकाणी स्टाॅल लावले आणि उत्पादित मालाची विक्री केली. केवळ राज्यातच नव्हे तर परदेशात अमेरिकेत लाडू पोहोचले आहेत असेही त्यांनी सांगितले. 

 *अभय मिरजकर, लातूर.* 

9923001824.