लातूर: महाराष्ट्रभर प्रतिष्ठा असलेल्या देशिकेंद्र विद्यालयात झालेल्या बेकायदा नोकर भरती प्रकरणात मोठी कारवाई होत असून, माध्यमिक शिक्षणाधिकारी कार्यालयातील संबंधित अधिकाऱ्यांवर आणि कर्मचाऱ्यांवर थेट गुन्हे दाखल करण्याचे आदेश देण्यात आले आहेत. पुण्याच्या शिक्षण उपसंचालक डॉ. वंदना वाहूळ यांनी लातूरच्या विभागीय शिक्षण उपसंचालकांना ही कडक कारवाई करण्याचे निर्देश दिले आहेत.
बेकायदा नोकर भरतीचा मोठा घोटाळा!
या प्रकरणात मुख्याध्यापिकेने संस्थेच्या अध्यक्ष आणि सचिवांची परवानगी न घेता थेट नोकर भरती केल्याचा प्रकार समोर आला आहे. विशेष म्हणजे, ही भरती मुख्याध्यापिका सेवानिवृत्त झाल्यानंतर करण्यात आली, जे अत्यंत धक्कादायक आहे. संस्थाचालकांना अंधारात ठेवून झालेल्या या बोगस भरतीने शिक्षण क्षेत्रात मोठी खळबळ उडवली आहे.
तक्रारदाराने घेतली थेट पुण्याच्या उपसंचालकांकडे धाव
या प्रकरणात सेवानिवृत्त सहाय्यक प्रकल्प अधिकारी विठ्ठल महापुराव भोसले यांनी शिक्षण उपसंचालकांसह संबंधित अधिकाऱ्यांना पत्र पाठवत बोगस भरतीच्या वैयक्तिक मान्यता तत्काळ रद्द करण्याची मागणी केली होती. मात्र, लातूरच्या शिक्षणाधिकाऱ्यांनी आणि उपसंचालकांनी कारवाईस दिरंगाई केल्यामुळे भोसले यांनी थेट पुणे येथील शिक्षण संचालनालयाकडे तक्रार केली.
शिक्षण उपसंचालकांचा थेट आदेश – तात्काळ एफआयआर दाखल करा!
या प्रकरणात दोन दिवसांच्या तक्रारीनंतर शिक्षण उपसंचालक डॉ. वंदना वाहूळ यांनी २८ मार्च रोजी आदेश जारी करत संबंधित सर्व दोषींविरुद्ध तात्काळ गुन्हे दाखल करण्याचे आदेश दिले. यामध्ये सेवानिवृत्त मुख्याध्यापिका एस. के. कल्याणी, नोकर भरतीसाठी जबाबदार असलेले स्नेहल कुमार खुडे, तसेच माध्यमिक शिक्षणाधिकारी कार्यालयातील दोषी अधिकारी व कर्मचारी यांचा समावेश आहे.
संपूर्ण शिक्षण व्यवस्थेवर प्रश्नचिन्ह!
या घोटाळ्यामुळे लातूरच्या शिक्षण प्रशासनाची विश्वासार्हता धोक्यात आली आहे. बेकायदा नोकर भरतीच्या या घटनेने संपूर्ण शिक्षण व्यवस्थेवर गंभीर प्रश्न उपस्थित केले आहेत. आता विभागीय शिक्षण उपसंचालक या आदेशाची अंमलबजावणी किती तत्परतेने करतात, याकडे सर्वांचे लक्ष लागले आहे.
ही घटना शिक्षण क्षेत्रातील भ्रष्टाचार आणि निष्काळजीपणाचा जळजळीत नमुना असून, संबंधित दोषींवर तातडीने कठोर कारवाई करण्याची मागणी जोर धरत आहे.
