लातूर परिमंडळातील १९५ वीजग्राहकांना मीळाली स्मार्ट बक्षिसे
लातूर, दि.२४ एप्रिल: महावितरणच्या लकी डिजिटल ग्राहक योजनेचा पहिला लकी ड्रॉ ऑनलाईन पध्दतीने दि. ७ एप्रिल २०२५ रोजी काढण्यात आला होता. या लकी ड्रॉ मधील विजेत्यांना स्मार्ट फोन व वॉचचे वाटप आज (दि.२४ एप्रिल) मुख्य अभियंता अरविंद बुलबुले यांच्या हस्ते करण्यात आले.
विद्युत भवन येथील येथे लेखा व वित्त विभागाचे वरिष्ठ व्यवस्थापक जालींदर मंगळवेढेकर, कार्यकारी अभियंता गणेश सामसे. अतिरिक्त कार्यकारी अभियंता ज्योती कुमठेकर, अतिरिक्त कार्यकारी अभियंता सुबोध डोंगरे, व्यवस्थापक लेखा आदित्य पाटील, दयानंद बनसोडे तसेच दिनेश ठाकूर यांच्या प्रमूख उपस्थितीत प्रातिनिधिक स्वरूपात मुख्य अभियंता अरविंद बुलबुले यांच्या हस्ते लातूर शहरातील विजेते सुकेशना कांबळे, नियामत हांसुरे, अभिमन्यु पाटील, बालाजी व्यवहारे आणि तुकाराम जाधव यांना बक्षिसांचे वाटप करण्यात आले. उर्वरीत विजेत्यांना त्या-त्या उपविभाग कार्यालयात वाटप करण्यात येत आहे. लातूर परिमंडळातील प्रत्येक उपविभाग स्तरावर एक या प्रमाणे पहिल्या क्रमांकाकरिता ३९ विजेत्या ग्राहकांना सॅमसंग कंपनीचा स्मार्ट फोन बक्षिस म्हणून दिले जात आहे. तर प्रत्येक उपविभागात प्रत्येकी दोन प्रमाणे दुसऱ्या क्रमांकासाठी ७८ विजेत्या ग्राहकांना एमआय कंपनीचा स्मार्ट फोन व प्रत्येकी दोन प्रमाणे तिसऱ्या क्रमांकासाठी ७८ विजेत्या वीजग्राहकांना फास्टट्रॅक कमपनीचे स्मार्ट वॉच बक्षिस म्हणून दिले जात आहे. यापुढील लकी ड्रॉ ७ मे ला काढण्यात येणार आहे. विजेत्या ग्राहकांची यादी महावितरणच्या संकेतस्थळावर उपलब्ध करून देण्यात आली आहे.
महावितरणने ऑनलाईन वीज बिल भरणाऱ्या ग्राहकांचा टक्का वाढविण्याच्या हेतूने लकी डिजिटल ग्राहक योजना सुरू केली आहे. या योजनेसाठी ऑनलाईन पध्दतीने वीज बिल भरणा करणारे सर्व लघुदाब वीज ग्राहक पात्र ठरणार आहेत. १ जानेवारी ते ३१ मे २०२५ या कालावधीत सलग तीन वा तीन पेक्षा अधिक वीज बिले ऑनलाईन पध्दतीने भरून योजनेच्या लाभाची संधी ग्राहकांना उपलब्ध करण्यात आली आहे.
ही योजना महावितरणच्या अशा लघुदाब चालू (एल टी- लाईव्ह) वीजग्राहकांसाठी लागू असून, ज्यांनी ०१ एप्रिल २०२४ पूर्वी मागील एक वर्ष म्हणजे ०१ एप्रिल २०२३ ते ३१ मार्च २०२४ या कालावधीत ऑनलाईन वीज देयक भरणा पर्याय वापरलेला नाही. ग्राहक रांगेत उभे राहण्यापेक्षा वेळ, श्रम व पैशांची बचत करीत डिजिटल पध्दतीने वीज बिल भरणा करण्यास प्राधान्य देत आहेत. ग्राहकांना डिजिटल पध्दतीने वीज बिलाचा भरणा करता यावा, यासाठी महावितरणकडून संकेतस्थळ, महावितरण मोबाईल ॲपची सुविधा ग्राहकांना उपलब्ध करून दिलेली आहे. ग्राहकांना देय रक्कमेवर ०.२५ टक्के डिजिटल वीज बिल भरणा सूट दिली जाते. परिणामी सध्या राज्यात ७० टक्के हून अधिक वीज ग्राहक ऑनलाईन पध्दतीने वीज बिलाचा भरणा करीत आहेत. हे प्रमाण वाढविण्यासाठी ग्राहकांना प्रोत्साहन देण्यासाठी लकी डिजिटल ग्राहक योजना राबविण्यात येत आहे.
या योजनेच्या कालावधीत ग्राहकाने नेट बँकिंग, डेबिट कार्ड, क्रेडिट कार्ड, यूपीआय, वॉलेट, कॅश कार्ड, एनएसीएच, क्यूआर कोड, एनईएफटी, आरटीजीएस इ. ऑनलाईन वीज बिल भरणा पर्याय वापरून लकी ड्रॉ महिन्याच्या अगोदर दरमहा एकप्रमाणे सलग तीन किंवा तीन पेक्षा जास्त महिने वीज बिल भरणे आवश्यक राहील.
फोटो ओळ: लकी ड्रॉ विजेत्यां सोबत मुख्य अभियंता अरविंद बुलबुले व इतर अधिकारी
