- निधीला मंजुरी मिळविण्यापासून ते निधी वर्ग करण्यासाठी पालकमंत्र्यांचा पाठपुरावा
• १४ मे २०२५ रोजीच्या कृषी विभागाच्या शासन निर्णयानुसार निधी वर्ग
लातूर, दि. 15 (जिमाका) : पालकमंत्री शिवेंद्रसिंहराजे भोसले यांच्या सातत्यपूर्ण पाठपुराव्यामुळे गेल्या काही वर्षांपासून प्रलंबित असलेल्या लातूरच्या जिल्हा सामान्य रुग्णालयाच्या जागेचा विषय मार्गी लागला आहे. या जागेच्या मोबदल्यासाठी आरोग्य विभागाला प्राप्त झालेला ३ कोटी ३२ लाख रुपयांचा निधी कृषी विभागाच्या १४ मे २०२५ रोजीच्या पत्रानुसार परभणी येथील वसंतराव नाईक मराठवाडा कृषी विद्यापीठाला वर्ग करण्यात आला. त्यामुळे ही जागा आरोग्य विभागाला हस्तांतरित होण्याचा मार्ग मोकळा झाला आहे.
सन २०१३ मध्ये जिल्हा सामान्य रुग्णालय उभारण्यास मान्यता देण्यात आली होती. १०० खाटांचे हे रुग्णालय उभारण्यासाठी राष्ट्रीय आरोग्य अभियानातून ३१ कोटी ८५ लाख रुपयांचा निधी ही प्राप्त झाला आहे. या रुग्णालयासाठी कृषि महाविद्यालयाची १० एकर जागा निश्चित करण्यात आली आहे. या जागेचा मोबदला म्हणून परभणी येथील वसंतराव नाईक मराठवाडा कृषी विद्यापीठाला ३ कोटी ३२ लाख ६८ हजार ६५० रुपये देण्यास मान्यता देण्यात आली होती. मात्र, निधी अभावी ही कार्यवाही प्रलंबित होती.
राज्याचे सार्वजनिक बांधकाम मंत्री शिवेंद्रसिंहराजे भोसले यांनी लातूर जिल्ह्याच्या पालकमंत्री पदाची जबाबदारी स्वीकारल्यानंतर पहिल्याच दौऱ्यात त्यांनी हा प्रश्न मार्गी लावण्याचा शब्द दिला होता. त्यानुसार मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री तथा वित्त मंत्री अजित पवार यांच्याकडे सातत्याने पाठपुरावा करून त्यांनी मार्चमध्ये झालेल्या अर्थसंकल्पीय अधिवेशनात जिल्हा रुग्णालयाच्या जागेसाठी आवश्यक निधी पुरवणी मागण्यांमध्ये मंजूर करून घेतला होता. हा निधी आरोग्य विभागाकडे प्राप्त झाला होता. सार्वजनिक आरोग्य मंत्री प्रकाश आबिटकर यांनीही यासाठी आवश्यक कार्यवाहीच्या सूचना दिल्या.
तसेच परभणी येथील वसंतराव नाईक मराठवाडा कृषी विद्यापीठाला हा निधी वितरीत करण्याबाबतचा शासन निर्णय सार्वजनिक आरोग्य विभागाने निर्गमित केला होता. मात्र, हा निधी कोणत्या खातेक्रमांकावर जमा करावा, याबाबत संभ्रम असल्याने कृषी विद्यापीठाने राज्य शासनाच्या कृषी विभागाकडे मार्गदर्शन मागविले होते. गेल्या काही दिवसांपासून हा विषय प्रलंबित होता.
याविषयी पालकमंत्री शिवेंद्रसिंहराजे भोसले यांनी मंत्रालय स्तरावर सातत्याने पाठपुरावा केल्यानंतर दिनांक १४ मे २०२५ रोजी कृषी, पशुसंवर्धन, दुग्धव्यवसाय व मत्स्यव्यवसाय विभागाने शासन निर्णय निर्गमित करून आरोग्य विभागाकडील निधी कृषी विद्यापीठाच्या महसूल खाती जमा करण्याचे निर्देश दिले. त्यानुसार जिल्हा रुग्णालयासाठी आवश्यक सर्वे क्र. ३७ मधील १० एकर जागेच्या मोबदल्यापोटी ३ कोटी ३२ लाख ६८ हजार ६५० रुपये निधी परभणी येथील वसंतराव नाईक मराठवाडा कृषी विद्यापीठाला वर्ग करण्यात आला आहे.
