लातूर | 16 नोव्हेंबर 2025

लातूर शहरात सध्या सुरू असलेल्या भूमिगत ड्रेनेज कामांच्या पाठीमागे प्रशासनाचे नियोजनशून्य धोरण आणि गुत्तेदारांची बेशिस्त मनमानी उघड होत आहे. शहराचा चढ-उतार, रस्त्यांची अवस्था, नुकतेच झालेले रस्ते — कोणत्याच अभ्यासाशिवाय हे काम सुरू आहे. काही महिन्यापूर्वी झालेले रस्ते देखील पुन्हा उखडले जात आहेत. नागरिकांना महिन्योनमहिने रस्त्यांची ददात मिळत नाही, तर दुसरीकडे आज बोधेनगरमध्ये जे दृश्य पाहायला मिळाले ते मन पिळवटून टाकणारे होते.

कोवळ्या मुलांच्या हातात सिमेंटच्या विटा…
आज बोधेनगर येथे भूमिगत ड्रेनेजच्या खोदकामावर लहान मुले सिमेंटच्या विटा उचलताना, माती वाहताना दिसली. हे पाहताक्षणी मनात एकच प्रश्न उभा राहिला —
गुत्तेदारांच्या स्वार्थाला आणि महानगरपालिकेच्या दुर्लक्षाला शेवटची मर्यादा नाही का?

बालमजुरी हा स्वतःमध्ये गुन्हा आहे. पण सरकारी निधीच्या कामात — महानगरपालिकेच्या देखरेखीखाली — एखादा गुत्तेदार उघडपणे लहान मुलांकडून काम करून घेत असेल, तर ही फक्त कायद्याची नव्हे तर मानवतेचीही पायमल्ली आहे.

❗ प्रशासन, बालमजुरी दिसत नाही का?

शहरातील प्रत्येक खड्डा दिसतो…
रस्त्यावरील प्रत्येक अडथळा दिसतो…
मग रस्त्यावर विटा उचलणाऱ्या या कोवळ्या हातांकडे तुमची नजर जात नाही का?

गुत्तेदारासाठी पैसा महत्त्वाचा…
महानगरपालिकेसाठी बिल महत्त्वाचे…
पण या मुलांचे आयुष्य कोण पाहणार?

जिल्हाधिकारी कार्यालय आणि महानगरपालिका दोन्हीही या गंभीर गुन्ह्याकडे डोळेझाक करत आहेत का? की पैशाच्या पुड्यांनी त्यांच्या डोळ्यांवर पट्ट्या बांधल्या आहेत?

⚖ बालमजुरीविरोधातील कायदे – थेट कारवाईसाठी पुरेसे!

बालमजुरी प्रतिबंधक व नियमन कायदा, 1986
बालकामगार (प्रतिबंध आणि पुनर्वसन) अधिनियम, 2016
याअंतर्गत —

• 14 वर्षांखालील मुलांकडून कोणतेही काम करवून घेणे संपूर्णपणे बेकायदेशीर
• गुत्तेदार, ठेकेदार, वर्क ऑर्डर धारक यांना थेट अटक
• पालकांच्या जबाबदारीसोबत सरकारी अधिकारी जराशी भूमिका निभावत नसतील तर त्यांच्या विरोधातही शिस्तभंगाची कारवाई शक्य

मग प्रश्न असा — लातूर महानगरपालिका काय पाहत बसली आहे?

💥 हे फक्त रस्त्यांचे खोदकाम नाही… ही लातूरची दुर्दशा आहे!

गेल्या काही महिन्यांपासून रस्त्यांच्या उचकापाचकबाबत अनेकदा लिहिले, सांगितले…
एका क्षणी निराश होऊन या विषयावर बातमी करायची नाही असे ठरवले.
पण जेव्हा आज रस्त्यावर मुलांच्या हातात विटा पाहिल्या —
मनाचा थरकाप झाला.

अशा दृश्यांमुळे लातूरकर नागरिकांच्या मनात एकच प्रखर मागणी उमटते —

🚨 या गुत्तेदाराला तात्काळ बेड्या ठोका!

जर प्रशासनात खरोखर नीतिमत्ता शिल्लक असेल,
जर जिल्हाधिकाऱ्यांच्या हृदयात बालहक्कांसाठी करुणा असेल,
तर या गुत्तेदारावर तात्काळ गुन्हा दाखल करून अटक केलीच पाहिजे.

ही फक्त बातमी नाही…
हा लातूरच्या जाणीवेचा आक्रोश आहे.

लातूर महानगरपालिकेने आणि जिल्हाधिकाऱ्यांनी यावर तात्काळ अवलोकन करावे,
कारण हा गुन्हा हलक्याने घेण्यासारखा नाही —
हा मुलांच्या भविष्यावर केलेला अत्याचार आहे.