समता, स्वावलंबन आणि करुणेचा संदेश; विविध खेळ व सांस्कृतिक कार्यक्रमांनी रंगली महिलांची मेजवानी
लातूर : बुद्ध गया महिला मंडळाच्या वतीने बुद्ध गार्डन येथे जागतिक महिला दिन अत्यंत उत्साहपूर्ण आणि प्रेरणादायी वातावरणात साजरा करण्यात आला. समाजातील महिलांचे योगदान, त्यांची जिद्द, नेतृत्व आणि प्रगती यांचा गौरव करणारा हा कार्यक्रम महिलांसाठी प्रेरणादायी ठरला.
कार्यक्रमाच्या प्रारंभी उपस्थित महिला पदाधिकाऱ्यांनी आपल्या मनोगतातून जागतिक महिला दिनाचे महत्त्व अधोरेखित केले. महिलांनी शिक्षण, स्वावलंबन आणि सामाजिक जाणीव यांच्या बळावर कुटुंबासोबतच समाजाच्या प्रगतीत मोठे योगदान दिले असून, आजच्या काळात महिलांचे नेतृत्व सर्वच क्षेत्रात ठळकपणे दिसून येत असल्याचे त्यांनी नमूद केले.
यावेळी आयु. सुरेखा प्रशांत मुगळे, आयु. लक्ष्मी दिनेश निलंगेकर, वैशाली लासुरे, शिंदेताई, महानंदा कांबळे, महादेवी कांबळे यांची उपस्थिती होती. कार्यक्रमाच्या अध्यक्षस्थानी वैशाली रमेश खंडागळे यांनी मार्गदर्शन केले.
कार्यक्रमात महिलांसाठी विविध मनोरंजनात्मक उपक्रमांचे आयोजन करण्यात आले. विशेषतः संगीत खुर्ची आणि तळ्यात मळ्यात या खेळांनी कार्यक्रमात उत्साहाची रंगत वाढवली. सहभागी महिलांनी या स्पर्धांमध्ये मोठ्या आनंदाने सहभाग घेतला आणि कार्यक्रमात उत्स्फूर्त वातावरण निर्माण झाले.
यावेळी भगवान गौतम बुद्धांच्या शिकवणीचा विशेष उल्लेख करण्यात आला. करुणा, समता, मैत्री आणि शांततेचा संदेश देणाऱ्या बुद्धांच्या विचारांचा अंगीकार केल्यास समाजात सौहार्द आणि समानतेचे वातावरण निर्माण होऊ शकते, असा संदेश उपस्थितांनी दिला. महिलांनीही या मूल्यांचा स्वीकार करून कुटुंब आणि समाजात सकारात्मक बदल घडविण्याचा संकल्प व्यक्त केला.
कार्यक्रमाच्या शेवटी सर्व महिलांनी एकत्र येत समता, सन्मान आणि प्रगतीचा संदेश देत महिला दिन साजरा केला. उत्साह, एकोप्याची भावना आणि प्रेरणादायी विचारांनी भरलेला हा कार्यक्रम सर्वांसाठी संस्मरणीय ठरला.
