लातूर, दि. १५ (प्रतिनिधी) पुरोगामी व क्रांतीकारी समाजवादी नेते मनोहरराव गोमारे राष्ट्रीय पुरस्कार यंदा सर्वोच्च न्यायालयातील ज्येष्ठ विधीज्ञ प्रशांत भूषण यांना प्रदान केला जाणार आहे. माजी खासदार डॉ. जनार्दन वाघमारे यांच्या अध्यक्षतेखालील निवड समितीने काल ही घोषणा केली. पुरस्कार वितरण समारंभ लातूर येथे रविवार, २१ डिसेंबर २०२५ रोजी होणार आहे. तसेच या समारंभात प्रशांत भूषण ‘भारतीय लोकशाही समोरील आव्हाने’ या विषयावर व्याख्यान देतील.
मनोहरराव गोमारे पुरोगामी विचारमंच, लातूर तर्फे हा पुरस्कार दिला जातो. यावर्षी पुरस्काराचे दुसरे वर्ष असून गेल्या वर्षी स्वराज हंडियाचे संयोजक व भारत ओडो अभियानाचे राष्ट्रीय संयोजक योगेंद्र यादव यांना हा पुरस्कार प्रदान करण्यात आला. पन्नास हजार, सन्मानपत्र असे पुरस्काराचे स्वरूप असून मनोहरराव गोमारे यांच्या स्मृतिप्रीत्यर्थ तो दिला जातो.
प्रशांत भूषण हे भारतातील सर्वोच्च न्यायालयातील वरिष्ठ अधिवक्ता, लेखक, सामाजिक आणि जनहित याचिका (पीआयएल) लढवणारे प्रसिद्ध व सार्वजनिक हिताचे वकील आहेत. ते भ्रष्टाचार, राजकीय आणि प्रशासकीय दुरुपयोग, पर्यावरणीय समस्या आणि नागरी हक्कांसाठी काम करणाऱ्यांचा कायदेशीर आवाज म्हणून ओळखले जातात. ते ‘भारत विरोधी भ्रष्टाचार चळवळी’तील मुख्य सदस्य होते आणि अण्णा हजारे यांच्या जन लोकपाल विधेयक चळवळीसाठी त्यांनी महत्त्वाची भूमिका बजावली. त्यानंतर त्यांनी आम आदमी पार्टी चा आधार घेतला पण नंतर त्यांनी पक्षाचा मार्ग आणि निर्णय यावर टीका केली. प्रशांत भूषण हे ‘न्यायालयाची पारदर्शकता वाढवावी’ अशी त्यांची भूमिका ते जोरात मांडत आहेत आणि लोकशाहींमध्ये अभिव्यक्ती स्वातंत्र्य व नागरिक अधिकार यांचे संरक्षण महत्त्वाचे आहे, यावर त्यांचा नेहमीच भर राहिला आहे.
लातुरचे वैचारिक नेतृत्व केलेले अॅडव्होकेट मनोहरराव गोमारे यांचे २० डिसेंबर २०२३ रोजी निधन झाले. ते महाराष्ट्राचे पुरोगामी, क्रांतिकारी आणि समाजवादी नेते होते. थोर समाजवादी नेते जयप्रकाश नारायण यांच्याकडून प्रेरणा घेऊन त्यांनी राजकारण सुरू केले. ते शेवटच्या दिवसापर्यंत पुरोगामी, क्रांतिकारी विचारसरणीत राहिले. ते लातूर एज्युकेशन सोसायटीचे अध्यक्ष होते. त्यांनी सामान्य लोकांच्या सामाजिक प्रश्नांसाठी आंदोलन करून लोकांना न्याय मिळवून देण्याचे काम केले आहे. एस. टी. चळवळीदरम्यान त्यांच्यावर लाठीचार्ज करण्यात आला होता. देशात आणीबाणी लागू झाली तेव्हा त्यांना अटक करून १९ महिने नाशिक तुरुंगात ठेवण्यात आले. डॉ. नरेंद्र दाभोलकर यांनी स्थापन केलेल्या महाराष्ट्र अंधश्रद्धा निर्मूलन समितीचे ते शेवटपर्यंत पदाधिकारी होते. त्यांनी महाराष्ट्र विधानसभेसाठी पाच वेळा आणि खासदारपदासाठी दोनदा निवडणूक लढवली आहे. ते एक संघर्षशील कार्यकर्ते होते.
माजी खासदार डॉ. जनार्दन वाघमारे यांच्या अध्यक्षतेखालील निवड समितीने काल एकमताने ॲड. प्रशांत भूषण यांची निवड केली. निवड समितीमध्ये सर्वश्री प्राचार्य डॉ. नागोराव कुंभार, माधव बावगे प्राचार्य डॉ. सोमनाथ रोडे, शिवाजी शिंदे, उदय गवारे, सूर्यकांत वैद्य, डॉ. बी. आर. पाटील
दिलीप आरळीकर, श्याम जैन, डॉ. कोमल गोमारे, ॲड. विश्वास मोमले, डॉ. गणेश गोमारे यांचा समावेश आहे.
