🌼 सद्गुणांचे वारस व्हा — भन्ते पय्यावंश

वैशाली सार्वजनिक बुद्ध विहार, लातूर येथे धम्म वर्षावास समारोप उत्सव संपन्न

लातूर, दि. १२ ऑक्टोबर २०२५ —
“भौतिक संपत्तीचा वारसा सर्वांनाच मिळतो, पण सद्गुणांचा वारसा घेणारे थोडेच असतात. जीवनात शांती हवी असेल, तर सद्गुणांचे पालन आणि वाईटाचा त्याग अपरिहार्य आहे,” असे उद्गार पूजनीय भन्ते पय्यावंश यांनी व्यक्त केले.

वैशाली सार्वजनिक बुद्ध विहार, बौद्ध नगर, लातूर येथे बुद्ध धम्म वर्षावास पुनीत सुसंस्कार पर्व समारोप सोहळा अत्यंत मंगलमय वातावरणात पार पडला. या प्रसंगी भिक्खु सुमेध नागसेन व भन्ते पय्यावंश यांच्या उपस्थितीत कार्यक्रमास धार्मिक तेज लाभले.

मुख्य अतिथी म्हणून पोलीस निरीक्षक संतोष पाटील (विवेकानंद चौक पो. स्टे.), संपादक अशोक चिंचोले, व संपादक दीपरत्न निलंगेकर उपस्थित होते. प्रारंभी भिक्खू संघ व मान्यवर पाहुण्यांच्या हस्ते भगवान बुद्ध व डॉ. बाबासाहेब आंबेडकर यांच्या प्रतिमेस पुष्पमाला अर्पण करून वंदना घेण्यात आली. कार्यक्रमाचे प्रास्ताविक केशव कांबळे यांनी केले.

भन्ते पय्यावंश यांनी आपल्या धम्मदेशनात सांगितले की, “अज्ञानामुळे माणूस अंधश्रद्धेच्या जाळ्यात अडकतो. घरात काळी बाहुली, गंडेदोरे बांधून सुख मिळत नाही; खरा धर्म म्हणजे सदाचार. ‘दया, क्षमा आणि शांती’ हेच माझे धर्मचिन्ह असावे, असे प्रत्येकाने ठरवावे. असे काही सत्कर्म करावे की मृत्यूनंतरही लोक आपले स्मरण करीत राहतील.”

समारोप प्रसंगी भिक्खू संघास चिवरदान करण्यात आले. प्रमुख पाहुण्यांचा शाल, सन्मानचिन्ह व बौद्ध ग्रंथ देऊन सन्मान करण्यात आला. ग्रंथवाचन केल्याबद्दल केशव कांबळे व त्यांच्या पत्नींचा शुभ्रवस्त्र देऊन गौरव करण्यात आला. कार्यक्रमासाठी उपासक-उपासिकांकडून भोजनदान तसेच विनोद खटके यांनी दहा हजार रुपये दान दिले.

संपादक अशोक चिंचोले यांनी आपल्या मनोगतात म्हटले की, “आपण पंचशीलाचा आचरणात अंगीकार केला पाहिजे. आज बुद्ध आणि धम्म आचरणात कमी असल्याने समाजात अराजकता आहे. आपण रोजच्या जीवनात पंचशील आचरणात आणतो ती काळाची गरज आहे असे सांगत, अशा कार्यक्रमांमुळे समाजात नैतिकता आणि शांती निर्माण होईल.”

संपादक दीपरत्न निलंगेकर यांनी आपल्या भाषणात सांगितले की, “वैशाली बुद्ध विहारातील हा कार्यक्रम येणाऱ्या पिढीला सुसंस्कार देणारा आहे. आषाढी पौर्णिमा ते अश्विन पौर्णिमा या वर्षावास काळात ‘धम्म पर्व’ ग्रंथ वाचनामुळे तरुण पिढीमध्ये सद्गुणांची बीजे पेरली जात आहेत. उद्या जर चांगले विचार समाजात उगवायचे असतील, तर आज ते विचार पेरण्याची जबाबदारी आपली आहे.”

शांती, प्रज्ञा आणि करुणेचा संदेश देणाऱ्या या समारोप कार्यक्रमाने बौद्ध नगर परिसरात सद्गुण, सदाचार व सुसंस्कारांची नवचैतन्याची ज्योत प्रज्वलित केली.

कार्यक्रम यशस्वी करण्यासाठी सूर्यभान लातूरकर, जगन्नाथ सुरवसे, गौतम चिकाटे, दामू कोरडे, हरिश्चंद्र सुरवसे, अमोल सुरवसे, आशीर्वाद कांबळे, कुणाल कांबळे, अजय गायकवाड, महादू गायकवाड, लता चिकाटे, लता गायकवाड, लता कांबळे, आशा बानटे, अनुराधा कांबळे, सविता चिकाटे आदींनी परिश्रम घेतले.

कार्यक्रमाची सांगता सूर्यभान लातूरकर यांच्या आभार प्रदर्शनाने व पूजनीय भिक्खू संघाच्या आशीर्वाचनाने झाली.