🔥लातूर मनपा निवडणुकीत ‘पारदर्शकतेचा फज्जा’

उमेदवारी अर्जांची अधिकृत माहितीच गायब; प्रशासनाच्या भूमिकेवर संशय

लातूर, दि. ३१ (प्रतिनिधी) –
लातूर शहर महानगरपालिका निवडणुकीसाठी प्रशासन पूर्णपणे सज्ज असल्याचा कागदोपत्री डांगोरा पिटला जात असला, तरी प्रत्यक्षात मात्र “दिव्याखाली अंधार” अशीच अवस्था दिसून येत आहे. प्रभागनिहाय किती उमेदवारांनी किती उमेदवारी अर्ज दाखल केले, याची अधिकृत माहितीच प्रशासनाकडून जाणीवपूर्वक लपवली जात असल्याचा गंभीर आरोप आता शहरातून होत आहे.

राज्यभरात महानगरपालिका निवडणुकांची रणधुमाळी सुरू असताना, लातूर महानगरपालिका प्रशासनाचा कारभार मात्र पूर्णपणे संशयाच्या भोवऱ्यात अडकलेला आहे. ३० डिसेंबर हा उमेदवारी अर्ज दाखल करण्याचा शेवटचा दिवस असतानाही, त्यानंतर दुसऱ्या दिवशी दुपारपर्यंतही अधिकृत आकडेवारी जाहीर करण्यात आली नाही. ही बाब केवळ निष्काळजीपणा की ठरवून केलेली गुप्तता, असा प्रश्न उपस्थित होत आहे.

विशेष म्हणजे, प्रशासनाची अधिकृत माहिती जिल्हा माहिती अधिकारी (DIO) यांच्या मार्फत दिली जाते, असे सांगितले जात असले तरी, त्यांनाच ही माहिती पुरवण्यात आली नाही.
“माहिती माझ्याकडे आली की लगेच पाठवतो,” असे सांगत सर्व पत्रकारांची आणि नागरिकांची केवळ बोळवण करण्यात आली.

प्रशासन जर खरोखरच सज्ज असेल, तर
▪️ प्रभागनिहाय अर्जांची संख्या जाहीर करण्यात उशीर का?
▪️ अधिकृत आकडेवारी लपवण्यामागे नेमका हेतू काय?
▪️ कोणाला, कशासाठी फायदा करून दिला जात आहे?

हे प्रश्न आता सामान्य नागरिक, राजकीय पक्ष आणि पत्रकार खुलेआम विचारू लागले आहेत.

निवडणूक प्रक्रिया पारदर्शक, मुक्त आणि निष्पक्ष असावी, ही केवळ कागदावरची घोषणा ठरते की काय, असा संशय निर्माण झाला आहे.
वेळीच प्रशासनाने खुलासा केला नाही, तर लातूर मनपा निवडणूक प्रक्रियेवरच प्रश्नचिन्ह उभं राहील, हे निश्चित.

🔴 सज्ज प्रशासन कुठे गडप झाले आहे?
🔴 ही गुप्तता कोणाच्या फायद्यासाठी?

लातूरकर आता उत्तरांची अपेक्षा करत आहेत — फक्त आश्वासनांची नाही!